հինգշաբթի, 26 նոյեմբերի 2015
Սահմանվել են ընտանեկան դրամագլխի օգտագործման նոր ուղղություններ
Կառավարության այսօրվա նիստում ընդունվել է համապատասխան որոշում, որն ուղղված է ընտանիքներում երրորդ և հաջորդ երեխաների դեպքում վճարվող ծննդյան միանվագ նպաստի և ընտանեկան դրամագլխի օգտագործման արդյունավետության բարձրացմանը: Նիստից հետո ՀՀ կառավարության մամուլի կենտրոնում կայացած ասուլիսում ՀՀ աշխատանքի և սոցիալական հարցերի նախարար Արտեմ Ասատրյանը մանրամասներ է ներկայացրել ընդունված որոշման վերաբերյալ: Ըստ նախարարի՝ կառավարության որոշմամբ հաստատվել է ընտանեկան դրամագլխի օգտագործման նոր ուղղություններ: Մասնավորապես, առաջարկվում է կառավարության որոշմամբ սահմանված ընտանեկան դրամագլխի միջոցների օգտագործման նպատակները հասանելի դարձնել թիրախային գյուղական բնակավայրերի բնակչության համար:
Այսպիսով հնարավորություն է ընձեռվում ընտանեկան դրամագլխի միջոցները օգտագործել նաև գյուղատնտեսության ոլորտում տրամադրված վարկի տոկոսագումար և մայր գումար վճարելու համար, եթե վարկի տոկոսադրույքը մասնակի սուբսիդավորվում է կառավարության 2011թ մարտի 31-ի որոշմամբ: Ընտանեկան դրամագլխի միջոցները կարող են օգտագործվել նաև հեռավոր, սահմանամերձ, բարձր լեռնային ու լեռնային մինչև 1000 բնակիչ ունեցող գուղական բնակավայրերում բնակելի տան, բնակարանի կամ անշարժ գույք գնելու համար:
