հինգշաբթի, 10 դեկտեմբերի 2015
Միտում չպարունակող, նվազ նշանակություն ունեցող տուգանքները կփոխարինվեն նախազգուշացմամբ
ՀՀ կառավարության այսօրվա նիստում հավանության է արժանացել մի շարք օրենքներում փոփոխություններ և լրացումներ կատարելու մասին ՀՀ օրենքների նախագծերի փաթեթը, որի ընդունման դեպքում հնարավորություն կստեղծվի լուծել ճանապարհային երթևեկության անվտանգության ապահովման բնագավառում առկա արդիական համարվող մի շարք խնդիրներ: Նիստից հետո կառավարության մամուլի կենտրոնում կայացած ասուլիսում ՀՀ արդարադատության նախարար Արփինե Հովհաննիսյանը մանրամասներ է ներկայացրել օրինագծերի փաթեթի վերաբերյալ: Նա նշել է, որ օրինագծերի փաթեթի ընդունման անհրաժեշտությունը պայմանավորված է ՀՀ Նախագահի մոտ 2015թ. սեպտեմբերի 11-ին տեղի ունեցած խորհրդակցության արդյունքում հանրապետական իրավասու գործադիր մարմիններին տրված հանձնարարականների պահանջների կատարմամբ: Այդ հանձնարարականների կատարման համար ՀՀ վարչապետի կողմից ձևավորվել էր աշխատանքային խումբ:
Այսպիսով՝ ճանապարհային երթևեկության անվտանգության ապահովման հիշյալ օրենսդրական փաթեթի ընդունմամբ, մասնավորապես, լուծում է տրվում միտում չպարունակող, նվազ նշանակություն ունեցող տուգանքները նախազգուշացմամբ փոխարինելու խնդրին: Օրենսդրական փաթեթով առաջարկվում է նաև չտուգանել այն դեպքերում, երբ իրավախախտը խախտումը կվերացնի տեղում: Խստացվել են առանց հաշվառման համարանիշի, կեղծված կամ փոխարինված հաշվառման համարանիշով տրանսպորտային միջոցներ վարելու համար նախատեսված տուգանքի չափը, ինչպես նաև տրանսպորտային միջոցները ոչ սթափ վիճակում վարելու համար նախատեսված տուգանքները:
