երկուշաբթի, 2 հոկտեմբերի 2017
Վերանայվել է ընտանիքների անապահովության գնահատման կարգը
ՀՀ աշխատանքի և սոցիալական հարցերի նախարարությունը քայլեր է ձեռնարկում սոցիալական պաշտպանության ոլորտում էլեկտրոնային ծառայությունների ընդլայնման ուղղությամբ: Ինչպես ՀՀ կառավարության մամուլի կենտրոնում այսօր կայացած ասուլիսում նշել է նախարար Արտեմ Ասատրյանը, ստեղծվել են 2018թ. հունվարի 1-ից երրորդ և հաջորդ երեխայի ծնվելու դեպքում երեխայի ծննդյան միանվագ նպաստը և խնամքի նպաստն առցանց ներկայացված տվյալների հիման վրա նշանակելուն և վճարելուն առնչվող հարաբերությունները կարգավորող իրավական հիմքերը: Անդրադառնալով անապահովության գնահատման մոտեցումներին ու մեթոդաբանությանը՝ Արտեմ Ասատրյանը նշել է, որ սոցիալապես անապահով ընտանիքների համար ինքնուրույնաբար կայուն եկամտի ձևավորման իրական հնարավորությունների ստեղծման նպատակով արմատապես վերանայվել է ընտանիքների անապահովության գնահատման կարգը: Նոր կարգում հնարավորինս ներառվել են տնտեսապես ակտիվ անձանց աշխատանքի շուկայում ունեցած վարքագծի գնահատականները՝ դրանով խթանելով աշխատանքային գործունեություն ծավալելու իրենց ցանկությունը: Ինչպես նաև ավելացել է երեխա ունեցող ընտանիքների անապահովության գնահատման հարցում երեխաների առկայության հանգամանքի կշիռը` դիտարկելով նման ընտանիքներին աղքատության տեսանկյունից ավելի ռիսկային:
Նախարարն անդրադարձել է նաև երիտասարդ մայրերի աշխատաշուկայում մրցունակության բարձրացմանն ուղղված քայլերին՝ նշելով, որ նոր պետական ծրագրերի ներդրման նպատակով մշակվել է համապատասխան օրինագիծ, որով սահմանվել է երիտասարդ մայրերի համար բարձրագույն մասնագիտական կրթություն ստանալուն նախապատրաստման աջակցության, ինչպես նաև երեխայի խնամքն աշխատանքին զուգահեռ կազմակերպելու համար աջակցության իրավունքը:
