երկուշաբթի, 19 ապրիլի 2010
Ճիշտ կառավարել ջրային պաշարները
Արարատի մարզի ձկնաբուծական տնտեսություններում մենաշնորհային երևույթներ ներկայումս չկան և չեն էլ լինի։ Ըստ «Արմենպրեսի», երեկ հրավիրված մամլո ասուլիսում տեղեկացնելով այս մասին՝ Հայաստանի բնապահպանության նախարար Արամ Հարությունյանը հերքեց տարածված լուրերը՝ նշելով, որ տնտեսավարողներն այստեղ մեծ ներդրումներ են իրականացրել, ինչը անհնար է դարձնում մենաշնորհի ձևավորումը։ Ա. Հարությունյանի խոսքով, նախարարությունը Արարատի և Արմավիրի մարզերի ձկնային տնտեսություններին հրավիրել է համագործակցության, որի նպատակը ջրային ռեսուրսների ճիշտ կառավարում կազմակերպելն է։
«Մենք անընդունելի ենք համարում ձկնային տնտեսությունների կողմից թույլ տված խախտումները, երբ վերջիններս ջրահեռացումը կատարում են դրենաժային համակարգով։ Այս ոլորտում կան նաև այլ խնդիրներ, որոնք պետք է կանոնակարգվեն»,–ասաց Ա. Հարությունյանը։
Նշենք, որ Արմավիրի մարզում ներկայումս գործում է 147, իսկ Արարատում՝ 87 ձկնային տնտեսություն։
Ըստ Ա. Հարությունյանի՝ նախարարության ուշադրության կենտրոնում է նաև Երևանում օդի աղտոտվածության խնդիրը. այս առումով ներկայումս իրականացվում է մոնիտորինգ, որպեսզի պարզվի ներկա իրավիճակը։
Նախարարի կարծիքով, Հայաստանում ուրանի հանքավայրերի շահագործման մասին դեռ վաղ է խոսել, ուստի բնապահպանական տեսանկյունից վտանգ ներկայումս չկա։ «Ուրանն իրենից վտանգ է ներկայացնում միայն հարստացման ժամանակ։ Նախկինում Հայաստանի տարածքում ուրանի հանքավայրերի մասով իրականացվել են հետազոտություններ։ Այդ տվյալներն արխիվացվել և տեղափոխվել են Ռուսաստան։ Այժմ ուսումնասիրվում են այդ փաստաթղթերը, որից հետո էլ կուրվագծվեն իրականացվելիք հետագա քայլերը»,–եզրափակեց Ա. Հարությունյանը։
