Հայաստանի Հանրապետության Կառավարություն

Լսել աուդիոնյութը

«Կենսաթոշակային բարեփոխումների իրականացման ճանապարհին. միջոցառումներ, անելիքներ» թեմայով այսօր կառավարության մամուլի կենտրոնում լրագրողների հարցերին են պատասխանել Աշխատանքի և սոցալական հարցերի նախարարի տեղակալ Արտեմ Ասատրյանը և Ֆինանսների փոխնախարար Վարդան Արամյանը։ Բանախոսները ներկայացրել են կենսաթոշակային բարեփոխումների իրականացման ճանապարհին կատարված քայլերը և իրականացվելիք փուլերը։ Արտեմ Ասատրյանը հայտնել է, որ կենսաթոշակային բարեփոխումների իրականացումն ապահովող շուրջ 50 օրենսդրական-իրավական ակտեր, 5 հիմնական օրենքների նախագծեր և ևս 44 օրենքներում փոփոխություններ են կատարել։ Դրանք առաջին ընթերցմամբ արդեն ընդունվել են Ազգային ժողովի կողմից։ Այսօր բարեփոխումները գտնվում են հանրությանը ներկայացման և հարցին առնչվող հիմնախնդիրները քաղաքական ուժերի, հասարակական կազմակերպությունների, գործատուների, ուսանողների` այսինքն բոլոր շահագրգիռ կողմերի հետ քննարկման փուլում է։ Աշխատանքի և սոցիալական հարցերի նախարարի տեղակալը նշել է այն փուլերը, որոնք պետք է իրականացվեն մոտ ապագայում։ Ըստ նրա այդ կարևորագույն փուլերից մեկը հանդիսանում է կուտակային կենսաթոշակային համակարգի ներդրումը։ 2011 թվականից գործարկվելու է կամավոր կուտակային համակարգը, որին` 2014 թվականին, հաջորդելու է պարտադիր կուտակային բաղադրիչի ներդրումը։ Այդ երեք տարիների ընթացքում բարեփոխումների պատասխանատուները կկարողանան գործարկել այն բոլոր միջոցները, ներդնել անհրաժեշտ ենթակառուցվածքները, որոնք հնարավորություն կտան աբողջովին գործարկել պարտադիր կուտակային բաղադրիչը։
Արտեմ Ասատրյանը նշել է նաև, որ կենսաթոշակային կուտակային համակարգին անցում կատարելը դեռևս չի նշանակում, որ ներկայիս համակարգը դադարելու է գործելուց։ Պետությունը շարունակելու է կենսաթոշակներ վճարել մարդկանց աշխատած տարիների համար։
Ֆինանսների փոխնախարար Վարդան Արամյանը ներկայացրել է կենսաթոշակային բարեփոխումների հետ կապված երաշխիքների ինստիտուտի կիրառման հիմնախնդիրը։ Այդ հարցին տրվել է լուծում։ Ըստ փոխնախարարի ներդրվել է երաշխիքային հիմնադրամ։ 2014 թվականից սկսած այն բոլոր գումարներն, որոնք ներդրվելու են քաղաքացիների կողմից ապահովվելու են 100 տոկոսով։ Վարդան Արամյանը նշել է, որ այդ հիմնադրամը ապահովելու է կուտակային գումարների 20 տոկոսը, իսկ մնացած 80 տոկոսի վերդարձը իրականացնելու է պետությունը սեփական միջոցների հաշվին։ Այս ամենը ամրագրված է բարեփոխումների մասին օրենսդրական փաստաթղթերում։
Ֆինանսների փոխնախարարը նշել է, որ Հայաստանի քաղաքացիները կարող են չմատոհգվել իրենց կուտակած գումարների համար։ Դրանք չեն փոշիանա։ Նրա խոսքով, 2011 թվականին կամավոր կուտակային համակարգին անցնելու գործընթացը խրախուսելու համար պետությունը խթանիչ քայլեր է իրականացնելու։