Հայաստանի Հանրապետության Կառավարություն

Լսել աուդիոնյութը

Այսօր կառավարության նիստում հաստատվել է «ՀՀ-ում 2010-2013 թվականներին սերմնաբուծության և սերմնարտադրության զարգացման ծրագիրը»։ Ծրագիրը մանրամասնելու համար կառավարության մամուլի կենտրոնում տեղի է ունեցել ճեպազրույց ՀՀ Գյուղատնտեսության նախարար Գերասիմ Ալավերդյանի մասնակցությամբ։ Ըստ նրա, վերջին 7-10 տարիների ընթացքում որակյալ սերմեր չեն ներկրվել հանրապետություն, որի պատճառով երկրում ցանքատարածությունները 2005 թվականի համեմատությամբ 130 հազար հեկտարից կրճատվել է մինչև 82 հազար հեկտարի։ Նախարարը ստեղծված իրավիճակը կապում է որակյալ սերմ չունենալու հետ։ Հայաստանում օգտագործվող 650-720 հազար տոննա ցորենից գերակշիռ մասը ներկրվում է։ Նրա հավաստմամբ 2010 թվականի վիճակագրության տվյալներով Հայաստանում արտադրվել է 2000 տոննա ցորեն, իսկ մնացածը ներկրվել է։ Այսօր կառավարությունում հաստատված ծրագիրը հնարավորություն է տալու 2014 թվականին ունենալ 120 հազար հեկտար ցորենի ցանքատարածություն, իսկ համախառն բերքի արդյունքը հասցնել 400-420 հազար տոննայի, որը հանրապետության ինքնաբավությունը 37 տոկոսից կհասցնի 55 տոկոսի։ Գյուղատնտեսության նախարարը տեղեկացրել է, որ կառավարությունը այսօրվա նիստում հատկացրել է 558 միլիոն դրամ, որոնք տրամադրվել են Հայաստանի Հանրապետության պետական աջակցություն գյուղատնտնեսական հողօգտագործողների ծրագրի մի մասից։
Ըստ Գերասիմ Ալավերդյանի մասնագիտական խումբ է գործուղվելու Ռուսաստանի Դաշնության Ստավրոպոլի երկրամաս, որտեղի սերմնաբուծարանից պետք է Հայաստան ներկրվի 1000 տոննա «էլիտար» տեսակի սերմնացու, որոնք պետք է բաժանվեն այն ֆերմերներին, որոնք կբավարարեն ՀՀ գյուղատնտեսության նախարարության բոլոր չափանիշները. դրանցից են հողի վարակվածությունը, 3 հեկտար և ավելի ցանքատարածությունները, քիմիական քաղհանի իրականացումը և այլն։ Հաջորդ տարի սերմը ստացած ֆերմերները հավաքված բերքը մեկին երկու հարաբերակցությամբ կվերադարձվեն Գյուղատնտեսության նախարարությանը։ Ծրագրի իրականացումից ակնկալվող արդյունքները տարեկան 3 հազար տոննա սերմ արտադրելն է։
Նախարարը հայտնել է նաև, որ վարչապետ Տիգրան Սարգսյանը հանձնարարություն է տվել բոլոր մարզպետներին ներկայացնել իրենց ղեկավարած մարզերում գյուղատնտեսության նախարարության սահմանած չափանիշներին համապատասխան հողատարածքների ցանկը։