Հայաստանի Հանրապետության Կառավարություն

Լսել աուդիոնյութը

Այսօր կառավարության մամուլի կենտրոնում տեղի է ունեցել Հայաստանի Հանրապետության վարչապետ Տիգրան Սարգսյանի և Ռուսաստանի Դաշնության փոխվարչապետ Ալեքսանդր Ժուկովի համատեղ մամուլի ասուլիսը։ Ներկայացվել են սպորտի բնագավառում երկու երկրների համագործակցությանը վերաբերող մի շարք հարցեր։
«Մեր սպորտային բազաները կարող են հետաքրքրել Ռուսաստանի մարզիկներին։ Հուսով եմ, որ կարծիքների փոխանակումը և սկսած համագործակցությունը  հաջողություններ կունենան, քանի որ ռուսական կողմի մոտ հետաքրքրություն կա։ Սովետական տարիներին սպորտի բնագավառի հաջողություններին նպաստել է նաև Հայաստանի տարածքում գտնվող սպորտային բազաների օգտագործումը։ Դա խոսում է այն մասին, որ Հայաստանում պրոֆեսիոնալ սպորտի զարգացման համար ներուժ կա»,- ասել է վարչապետ Տիգրան Սարգսյանը։
Ալեքսանդր Ժուկովը նշել է, որ իր այցի նպատակը երկու երկրների սպորտի բնագավառներում, մասնավորապես, Օլիմպիական կոմիտեների միջև համագործակցութան ամուր կապեր հաստատելն է։
«Հայաստանը խորհրդային տարիներին հայտնի էր սպորտային ավանդույթներով։ Հայաստանում գործում էին կարևոր սպորտային բազաներ։ Մարզիկները, պատրաստվելով բազայի բարձր մակարդակի պայմաններում, լավագույն արդյունքներ են ցույց տվել։ Այսօր էլ Հայաստանն ակտիվորեն մասնակցում է միջազգային մրցումներին»,- ասել է ՌԴ փոխվարչապետը։ Ըստ նրա` Ծաղկաձորում գտնվող սպորտային բազան պահանջարկ ունի նաև այսօր։
«Մենք պետք է զարգացնենք մեր համագործակցությունն այդ ուղղությամբ և օգտագործենք բոլոր հնարավորությունները։ Ռուսաստանի մարզիկները կարող են վերապատրաստվել Հայաստանում, մենք էլ մեր հերթին պատրաստ ենք տրամադրել մեր մարզիչների փորձը։ Կարող ենք հնարավորություններ ստեղծել, որ երկու երկրների թիմերը մրցումներին համատեղ պատրաստվեն։ Կարծում եմ, այս բնագավառում համագործակցությունը զարգացնելու համար լուրջ ներուժ կա»,- ավելացրել է ՌԴ փոխվարչապետը։

Հանդիպմանը ներկայացվել է նաև Սևանում իրականացվելիք ներդրումային մի ծրագիր, որով նախատեսվում է սպորտային բազա ստեղծել։ Ըստ փոխվարչապետ Ալեքսանդր Ժուկովի, դա կարող է լավագույն ձևով լրացում լինել Ծաղկաձորի մարզական բազային։
ՀՀ կառավարության ղեկավարը և ՌԴ փոխվարչապետը կարծիքներ են փոխանակել Հայաստանի և Ռուսաստանի տարբեր ոլորտներում իրականացվող բարեփոխումների վերաբերյալ։ Դրանք վերաբերում են հիմնականում սոցիալական ոլորտին, մասնավորապես, կենսաթոշակային բարեփոխումներին, ինչպես նաև կրթական, առողջապահական բնագավառներին։