Հայաստանի Հանրապետության Կառավարություն

Լսել աուդիոնյութը

Այսօր կառավարության նիստում հաստատվել է Հայաստանի Հանրապետությունում 2010-2014 թվականներին ցորենի սերմնաբուծության և սերմարտադրության զարգացման ծրագիրը հաստատելու և սերմերի ներկրումը թույլատրելու մասին որոշումը, որի մասին կառավարության մամուլի կենտրոնում պարզաբանումեր է տվել ՀՀ գյուղատնտեսության նախարար Գերասիմ Ալավերդյանը: Նախարարը տեղեկացրել է, որ նախորդ կառավարության նիստերից մեկում 558 մլն դրամ էր հատկացվել ծրագրի իրականացման համար, որի հիմնական խնդիրը Հայաստան “Էլիտա” որակյալ սերմնացու բերելն է: Ռուսաստանի Դաշնության Ստավրոպոլի երկրամասի “ԼՈՒՉ” փորձարարական տնտեսություն սահմանափակ պատասխանատվությամբ ընկերությունից 950 տոննա սերմնացու կներկրվի Հայաստան: Ձեռք բերումն ու ներկրումը իրականացնելու համար Ստավրոպոլի երկրամասում են եղել Գյուղատնտեսության նախարարի տեղակալ Սամվել Գալստյանի գլխավորած աշխատանքային խումբը, որտեղ մանրամասն ուսումնասիրել են սերմնացուների տեսակները: Բացի ներկրված սերմնացուներից Գյումրու սերմնաբուծական սելեկցիոն կայանից, Էջմիածնի երկրագործական գիտական կենտրոնից ու ևս երկու մասնավոր կազմակերպություններց ձեռք կբերվի նաև տեղական սերմնացու մոտ 500 տոննա չափաքանակով: Նախարարը հայտնել է նաև, որ վարչապետ Տիգրան Սարգսյանը հանձնարարականով բոլոր մարզպետները ներկայացնել են իրենց ղեկավարած մարզերում գյուղատնտեսության նախարարության սահմանած չափանիշներին համապատասխան հողատարածքների ցանկը: Այս ծրագրի ավարտին նախատեսվում է ունենալ 115-120 հազար հա ցորենի ցանքատարածություններ: 2009 թվականի տվյալներով ցորենի ցանքատարածությունների քանակը նվազել էր մինչև 82.700 հա, որի պատճառը անորակ սերմացուի առկայություն է եղել: Ծրագրի շահեկան առավելություններից Գերասիմ Ալավերդյանը համարում է այն, որ 2014 թվականից հետո Հայաստանում կստանան 350-400 հազար տոննա ցորենի արտադրություն, որի արդյունքում կնվազի նաև ներկրումները, որը իր հերթին կբերի հանրապետության ինքնաբավության մակարդակի բարձրացման` 37 տոկոսից կհասցնի 55 տոկոսի: