հինգշաբթի, 26 օգոստոսի 2010
Ազատականացվում է տեխզննության կայանների գործունեության կարգը
Հայաստանի Հանրապետության կառավարության որոշմամբ տեխզննության կայանների գործունեության կարգն ազատականացվում է։ Այդ մասին կառավարության նիստին հաջորդած ճեպազրույցի ժամանակ խոսել է ՀՀ տրանսպորտի և կապի նախարար Մանուկ Վարդանյանը։
«Կառավարության որոշմամբ ամբողջությամբ ազատականացվում է տեխզննության կայանների գործունեության կարգը` իրականացնելով մի շարք փոփոխություններ։ Նախկինում սահմանված էր, որ տեխզննության կայանը պետք է սպասարկի կոնկրետ տարածք։ Փոփոխությունների արդյունքում յուրաքանչյուր մարդ կարող է ավտոմեքենայի տեխզննում իրականացնել ցանկացած վայրում»,-նշել է նախարարը։
Ըստ Մանուկ Վարդանյանի, այսօր հանրապետությունում գործում են սահմանափակ քանակությամբ` 31 տեխզննման կայաններ, սակայն անհրաժեշություն կա դրանց քանակն ավելացնել։
«Կան մարզեր որտեղ ընդամենը մեկ կամ երկու տեխզննման կայան կա։ Մասնավորապես, Վայոց ձորի մարզում գործում է միայն մեկը, իսկ դա նշանակում է, որ մարդիկ հերթերի գոյացման պատճառով ստիպված պետք է լինեն այլ մարզեր այցելել»,-ասել է Մանուկ Վարդանյանը։ Ըստ նրա` կայանների թվի ավելացմամբ կհեշտացվի ավտոմեքենաների տեխզննման գործընթացը։
