Հայաստանի Հանրապետության Կառավարություն

Լսել աուդիոնյութը

ՀՀ կառավարությունը հեշտացնում է կենդանական ծագման մթերքի արտահանման և ներմուծման գործընթացը։ Այդ առնչությամբ ՀՀ կառավարությունն իր այսօրվա նիստում հավանության է արաժանացրել մի շարք նախագծեր։ Նիստին հաջորդած մամուլի ասուլիսի ժամանակ Գերասիմ Ալավերդյանը, նշել է, որ կառավարության կողմից հավանության արաժանացած որոշումները հնարավորություն կընձեռեն գյուղացիական տնտեսություններին, տնտեսվարողներին առավել քիչ փաստաթղթեր լրացնել կենդանական ծագման մթերքի արտահանման և ներմուծման դեպքում։
Գյուղատնտեսության նախարարի խոսքով, կառավարության որոշմամբ ուժը կորցրած է համարվել նախկին որոշումը, որով սահմանվում էր կենդանական ծագման սննդամթերքի արտահանման և ներմուծման համար հայտերի ներկայացման կարգը։ Այսինքն` եթե ներկրվող և արտահանվող ապրանքատեսակներն արդեն անցել են լաբորատոր փորձաքննություն և ունեն համապատասխան փաստաթուղթ, ապա լրացուցիչ հայտ ներկայացնելու և կրկին փորձաքննելու անհրաժեշտություն չկա։ Գերասիմ Ալավերդյանի խոսքով, այս որոշումներով փորձ է արվում Հայաստանում խթանել ձկնաբուծությունը։
Անդրադառնալով Հայաստանում արտադրված կենսապարարտանյութին, Գյուղատնտեսության նախարար Գերասիմ Ալավերդյանը նշել է, որ այժմ Հայաստանում արտադրվում է «Ազոտովիտ-1» և «Ազոցեովիտ-1» կենսապարարտանյութերը, որոնք մոտ 30 հա հողատարածքի վրա փորձարկվել է և դրական արդյունք է արձանագրվել։ Նախարարի խոսքով, հանձնարարական է տրվել Գյուղատնտեսության նախարարությանը, որպեսզի համապատասխան միջոցառումներ ձեռնարկվեն կենսապարարտանյութերի օգտագործումը խթանելու ուղղությամբ` իրազեկելով բնակչությանը։
«Մենք եղանք Արարատի մարզում և տեսանք, թե ինչպիսի դրական արդյունքներ են տվել այդ կենսապարարտանյութերը։ Սրանով մենք խթանելու ենք մեր հողերի որակի բարելավումը»,-ասել է Գերասիմ Ալավերդյանը։ Նրա խոսքով, տեղում պարարտանյութ արտադրելը հնարավորություն կտա հետագայում չներկրել։ Նշենք, որ պարարտանյութեր Հայաստան ներկրվում են Իրանից, Ռուսաստանից։ Ըստ նախարարի, 2-3 տարվա ընթացքում հնարավոր կլինի պարարտանյութ արտահանել։ Կենսապարարտանյութն արտադրվում է Երևանում։