Հայաստանի Հանրապետության Կառավարություն

Լսել աուդիոնյութը

Կառավարությունը պարզեցնում է արոտավայրերը, խոտհարքները գյուղացիներին տրամադրելու գործընթացը։ Այդ առնչությամբ այսօր ՀՀ կառավարության նիստում հաստատվել է «Արոտավայրի և խոտհարքի օգտագործման մասին» որոշման նախագիծը։ Նիստին հաջորդած մամուլի ասուլիսի ժամանակ ՀՀ արդարադատության նախարար Գևորգ Դանիելյանը նշել է, որ գյուղացին հողատարածքների օգտագործման համար հայտարարված մրցույթում հաղթելու դեպքում պետք է կնքի բնօգտագործման պայմանագիր։ Այսինքն` գյուղացին ստիպված չի լինի գործ ունենալ Անշարժ գույքի և կադաստրի պետական կոմիտեի, Նոտարական գրասենյակի հետ։ Ավելին` գյուղացին ազատվում է որոշակի վճարումներ կատարելուց։ Գևորգ Դանիելյանի խոսքով, կկրճատվեն վարչարարության հետ կապված ծախսերը և բյուրոկրատական քաշքշուկները։ Ըստ նրա` այս որոշումն իր նկատելի ազդեցությունը կունենա։
«Բնակչությանը մատուցվող ծառայությունը պետք է հնարավորինս լինի մատչելի, ինչպես նաև զերծ լինի կոռուպցիոն ռիսկերից։ Այդ պարագայում, բնականաբար, վարչարարության լծակները հնարավորության սահմաններում պետք է սահմանափակվեն։ Կառավարությունն այդ ուղղությամբ մի քանի քայլ արդեն կատարել է։ Այս որոշման նախագիծը նույնպես ուղղված է դրան»,-ասել է Գևորգ Դանիելյանը։