հինգշաբթի, 11 նոյեմբերի 2010
Անշարժ գույքի կադաստրի պետական կոմիտեի համակարգում կիրականացվեն բարեփոխումներ
Կառավարության այսօրվա նիստում հավանության է արժանացել ՀՀ կառավարությանն առընթեր անշարժ գույքի կադաստրի պետական կոմիտեի համակարգում բարեփոխումների իրականացման հայեցակարգը։
Նիստին հաջորդած ասուլիսի ժամանակ նշել է կոմիտեի նախագահի տեղակալ Աշոտ Մուսայանը, բարեփոխումները ենթադրում է սպասարկման որակի բարձրացում, անհարկի քաշքշուկների վերացում, իրավունքի պետական գրանցման և տեղեկատվության տրամադրման ընթացակարգերի պարզեցում։ Նրա տեղեկացմամբ, համակարգի կողմից իրականացվող գործառույթները առավելագույնս կավտոմատացվեն, որի արդյունքում նվազագույնի կհասցվի համակարգի աշխատողների և դիմողի միջև շփումը։ Անշարժ գույքի կադաստրի պետական կոմիտեի նախագահի տեղակալի համոզմամբ, այն իր հերթին կբերի կոռուպցիոն ռիսկերի նվազեցմանը։
«Հետագայում ավտոմատացված համակարգի ներդրմամբ կկարողանանք ավելի լայն տեղեկատվական բազա ունենալ»,- ասել է Աշոտ Մուսայանը։
Կոմիտեի նախագահի խորհրդական Խաժակ Կարայանի ներկայացմամբ, հայեցակարգով նախատեսվում են գլոբալ բարեփոխումներ` ուղղված քաղաքացիների սպասարկման որակի բարձրացանը, ստեղծվելու է օն-լայն գրանցման և տեղակատվության համակարգ։ Կադաստրի պետական կոմիտեում նախատեսվում են նաև կառուցվածքային փոփոխություններ. օրինակ Երևանում նախատեսվում է ունենալ ընդամենը մեկ տարածքային ստորաբաժանում իր մի քանի սպասարկման գրասենյակներով։ Տեղազննումն ու չափագրումը մասնավորեցվելու է և չի լինելու Կոմիտեի մենաշնորհը. քաղաքացին ցանկացած արտոնագրված չափագրողի կողմից բերելով իր փաստաթղթերը, կադաստրի պետական կոմիտեում կստանա գրանցում։
Նախատեսվում է, որ նոր համակարգը կգործի 2012 թվականի հունվարի մեկից։
