հինգշաբթի, 23 դեկտեմբերի 2010
Ինտեգրացված սոցիալական ծառայություններում կգործի "մեկ ընդունարան" սկզբունքը
Կառավարության նիստին հաջորդած մամուլի ասուլիսի ընթացքում Աշխատանքի և սոցիալական հարցերի նախարար Արթուր Գրիգորյանը պարզաբանումներ է տվել "Ինտեգրացված սոցիալական ծառայությունների տրամադրման միասնական համակարգի կառուցվածքագործառութային մոդելի" հայեցակարգի մոտեցումների և ընտանիքների անապահովության գնահատման համակարգերի նոր մոդելների ներդրման վերաբերյալ։
Հայեցակարգի նպատակն է բնակչության սոցիալապես խոցելի խավերին այսուհետ սոցիալական ծառայություններ տրամադրել համալիր լրակազմով։ Ըստ հայեցակարգի` 2011 թվականին նախատեսվում է առանձին սոցիալական համալիր կենտրոնների ստեղծումը։ Սոցիալական ոլորտին տրամադրված դրամական միջոցներն այսուհետ կհամակարգվեն մեկ կառույցի կողմից։ Ինչ վերաբերում է սոցիալական ծառայություններին, դրանց գործառույթները կիրականացվեն համայնքների կողմից։ Նախարարը նշել է, որ մարզերում և հինգ քաղաքներում արդեն ներդրվում է "Մեկ ընդունարան" գաղափարը. քաղաքացիների համալիր սպասարկում և խորհրդատվություն։
""Մեկ ընդունարանում" պետք է իրականացվի դրամական միջոցների նշանակում և վճարում, իսկ սոցիալական աշխատանքը տարանջատվում է և դառնում է համայանքային մարմին և համայնքը պետք է իր բնակիչների համար կազմակերպի սոցիալական ծառայություն` իրավաբանական, վերականգնողական, դրամական օգնություն, խնամքի կազմակերպում, ժամանակավոր օթևանի տրամադրում և սոցիալական ծառայությունների մասին օրենքով չարգելված այլ միջոցառումներ։ Այստեղ դրամական օգնությունը տեղական ինքնակառավարման մարմնի կողմից նախատեսված օգնությունն է",-ասել է Աշխատանքի և սոցիալական հարցերի նախարարը։ Նրա խոսքով սոցիական աշխատողը պետք է "դեպքի վարում" իրականացնի` ճանաչելով սոցիալապես անապահով բոլոր բնակիչներին։
Անդրադառնալով գործադիրի կողմից հաստատված սոցիալական ոլորտին նվիրված մեկ այլ օրենքին` Արթուր Գրիգորյանը տեղեկացրել է, որ սահմանվել է պետական նպաստների համակարգում սահմանվել է համապատասխան միջոցառումների ժամանակացույցը։ Ըստ նախարարի, 2011 թվականից ընտանիքների ապահովության գնահատման համակարգում նախատեսվում է կբարձրացվի հասցեականությունը, կկանոնակարգվի բոլոր փաստաթղթերը և կներկայացվի սոցիալական ծառայություն։ Նախարարի խոսքով` քաղաքացիներն այլևս չեն զբաղվի փաստաթղթերի հավաքագրմամբ. "Երբ քաղաքացին դիմում է սոցիալական ծառայություն ընտանեկան նպաստ ստանալու համար նա լրացնելու է դիմում-հայտարարագիր, որի հիման վրա սոցիալական ծառայությունը կատարելու է համապատասխան հարցումներ` ճշտելու ընտանիքի կազմը բնակության իրական հասցեն, վայրը"։ Արթուր Գրիգորյանի հավաստմամբ, ընտանեկան նպաստից օգտվողներն այյևս ստիպված չեն լինի տարբեր չինովնիկական դռներ ծեծել, փաստաթղթեր հավաքագրել ու ներկայացնել սոցիալական ծառայություն։
