Հայաստանի Հանրապետության Կառավարություն

Լսել աուդիոնյութը

Կառավարությունը ապրիլի 1-ից սկսել է գյուղատնտեսական վարկերի սուբսիդավորումը: Այս մասին այսօր տեղեկացրել է ՀՀ ֆինանսների նախարար Վաչե Գաբրիելյանը: Պետական ծրագրով նախատեսված վարկավորման ծառայությունները մատուցվելու են երեք բանկերի կողմից. դրանք են` Ակբա-Կրեդիտ Ագրիկոլ, Արդշինինվեստ, և Կոնվերս բանկերը: Այդ վարկերը տրամադրվելու են տարեկան 14 տոկոս տոկոսադրույքով, որից 4ը սուբսիդավորելու է պետությունը և այն գյուղացուն տրվելու է մարման արտոնյալ ժամկետներով: Տրամադրվող գյուղատնտեսական վարկերի մարումը գուղացիները պետք է կատարեն միայն 6 ամիս հետո, վարկերի մարման համար տրվելու է առնվազն մեկ տարի ժամկետ:
Ֆինանսների նախարարը տեղեկացրել է նաև, որ առանձնացվել են 200 գյուղեր, որոնցում աղքատության մակարդակը առավել բարձր է և այս գյուղերի բնակիչների համար գյուղատնտեսական վարկերը առավել մեծ տոկոսներով կսուբսիդավորվեն: «Այդ համայնքներում սուբսիդավորման տոկոսը կլինի 6 տոկոս: Մենք իրականացնում ենք այնպիսի քաղաքականություն, որ հնարավորինս շատ օգնություն գնա առավել կարիքավոր համայնքներին և դրանք լինելու են փոքր վարկեր, որպեսզի հասանելի լինեն գյուղացիական տնտեսություններին»,- նշել է Վաչե Գաբրիելյանը:
Նախարարի խոսքով՝ վարկերը կլինեն փոքր՝ 2-3 մլն դրամի սահմաններում։ Բանկերը վարկավորումը կիրականացնեն սեփական ռեսուրսների հաշվին։ Ֆինանսների նախարարը ենթադրում է, որ այս ծրագրով գյուղացիությունը 6-10 մլրդ դրամի ծավալով վարկային միջոցներ կստանան։ Սուբսիդավորման գումարը բյուջեում 250 մլն դրամ է, սակայն չի բացառվում, որ այն ավելացվի կառավարության պահուստային ֆոնդի հաշվին։

Մանրամասները աուդիոնյութում