Հայաստանի Հանրապետության Կառավարություն

Լսել աուդիոնյութը

Հայաստանի Հանրապետության կառավարության նիստում այսօր ընդունվել է որոշման նախագիծ «Ավելացված արժեքի հարկի մասին» Հայաստանի Հանրապետության օրենքում փոփոխություններ կատարելու մասին»: Նիստից հետո տեղի ունեցած ճեպազրույցում հարցի վերաբերյալ պարզաբանումներ է տվել Գյուղատնտեսության նախարար Սերգո Կարապետյանը, ով նշել է, որ օրենքի նախագծի ընդունումը պայմանավորված է ագրարային ոլորտի նկատմամբ մեր պետության որդեգրած քաղաքականությամբ:
Նրա խոսքով` ճյուղի զարգացման համար պետք է ապահովել գյուղատնտեսության մեջ օգտագործվող ռեսուրսների մատչելիութունը. մասնավորապես խոսքը վերաբերում է գյուղատնտեսական տեխնիկային, դրանց պահեստամասերին, թունաքիմիկատներին, պարարտանյութերին, որոնք հիմնականում ներկրվում են արտերկրից:
Ինչպես նշել է նախարարը, սույն օրենքի փոփոխությամբ ներմուծվող գյուղտեխնիկան, մշակաբույսերի սերմերը, պարարտանյութերը, թունաքիմիկատներն ազատվում են ավելացված արժեքի հարկից:
«Դա կբերի բուսաբուծության զարգացմանը մեր երկրում և վերջին հաշվով գյուղատնտեսական մթերքների գների իջեցմանը շուկայում, որովհետև վաճառքի ժամանակ արտադրանքի վրա հաշվառվում էր ԱԱՀ-ն»,- նշել է գյուղատնտեսության նախարարը:
Սերգո Կարապետյանը կարևորել է գյուղատնտեսական տեխնիկայի պարկի թարմացմանը: «Գիտեք` մեր երկրում գյուղատնտեսական տեխնիկան շատ հնացած է, որը գալիս է դեռ խորհրդային տարիներից, և թարմացման կարիք կա, և գների բարձր լինելու պատճառով տնտեսվարող սուբյեկտները հնարավորություն չունեն թարմացնելու իրենց տեխնիկան»,- ավելացրել է ՀՀ գյուղատնտեսության նախարարը:

Մանրամասները` աուդիոնյութում