Հայաստանի Հանրապետության Կառավարություն

Լսել աուդիոնյութը

Արևելյան գործընկերության 4-րդ պլատֆորմի երիտասարդական համաժողովը Երևանում կանցկացվի մարտի 26-28-ը: Այսօր կառավարության մամուլի կենտրոնում հրավիրված ասուլիսում նշել է Հայաստանի Հանրապետության վարչապետին առընթեր Ազգային երիտասարդական քաղաքականության խորհրդի նախագահի տեղակալ, ՀՀ սպորտի և երիտասարդության հարցերի նախարարի տեղակալ Արսեն Քարամյանը: «Այն հնարավորություն կտա քննարկել երիտասարդության խնդիրներն ու մարտահրավերները, գտնել դրանց լուծումները»,- ասաց Քարամյանը: Միջոցառմանը մասնակցելու հրավերներ են ուղարկվել Արևելյան գործընկերներության բոլոր երկրներին` Ադրբեջանին, Բելառուսին, Վրաստանին, Մոլդովային և Ուկրաինային, սակայն Ադրբեջանը չի ժամանել Երևան մասնակցելու համաժողովին:
Հայաստանում Եվրամիության պատվիրակության ղեկավար Տրայան Հրիսթեայի խոսքով` Եվրոպական հանձնաժողովը 2012-2013 թվականներին շարունակելու է ամրապնդել Արևելյան գործընկերներության պետությունների հետ համագործակցությունը երիտասարդական ոլորտում: «Մենք շարունակելու ենք օժանդակել երիտասարդական քաղաքականության հարցերով զբաղվող պետական գործիչների և քաղաքացիական հասարակության ներկայացուցիչների կատարելագործմանը՝ մեծացնելով երիտասարդական ծրագրերի ֆինանսավորումը տարածաշրջանում»,- ասաց Հրիսթեան: Նրա խոսքով՝ միջոցառումները կֆինանսավորվեն Արևելյան գործընկերության երիտասարդական ծրագրի միջոցով (բյուջեն` 3 մլն. եվրո), որի շրջանակներում 2012 թվականի երկրորդ կեսին ներդրվելու է Արևելյան գործընկերության երիտասարդական մարզային բաժինը՝ Եվրոպական միության «Երիտասարդությունը շարժման մեջ» ծրագրի միջոցով:
Նախատեսվում է, որ կֆինանսավորվեն շուրջ 1400 լրացուցիչ ծրագրեր` ընդգրկելով շուրջ 21 հազար պատանիների ու երիտասարդ աշխատողների երիտասարդական փոխանակման ծրագրերից, կամավորական ծառայություններից և ցանցային գործունեությունների մասնակիցներից: Ֆինանսավորման մեծացման հարցը ենթակա է Եվրոպական հանձնաժողովի պաշտոնական հաստատմանը: Որոշման ընդունումը ակնկալվում է հաջորդ ամսվա ընթացքում:
Հրիսթեան նշեց, որ իրենց առաջնային նպատակն է օժանդակել առավելապես վատ պայմաններում գտնվող գյուղական և քաղաքի լքված վայրերում բնակվող երիտասարդներին: Այլ նպատակների շարքում են տարածաշրջանում երիտասարդներին նվիրված գործունեության վերաբերյալ իրազեկվածության բարձրացումն ու դրական փորձի փոխանակումը:

Մանրամասները աուդիոնյութում