Հայաստանի Հանրապետության Կառավարություն

Լսել աուդիոնյութը

ՀՀ կառավարության մամուլի կենտրոնում այսօր կայացել է ՀՀ կառավարությանն առընթեր պետական գույքի կառավարման վարչության պետի տեղակալ Աշոտ Մարկոսյանի մամուլի ասուլիսը: Բանախոսը ներկայացրել է կառավարության այսօրվա նիստում ընդունված ՀՀ կառավարության 2001 թվականի փետրվարի 22-ի N125 որոշման մեջ փոփոխություններ և լրացումներ կատարելու մասին որոշումը:
Ըստ Ա.Մարկոսյանի, այսուհետ պետական ոչ առևտրային կազմակերպություններին ՀՀ օրենսդրությամբ վերապահված անհատույց օգտագործման իրավունքով ամրացված գույքը (բացառությամբ հանրակրթական դպրոցներում սովորողների սննդի կազմակերպման համար տրամադրվող տարածքների, ինչպես նաև մինչև 3 ամիս ժամկետով տրամադրվող տարածքների) վարձակալությամբ տրամադրվում է աճուրդով, իսկ ժամավճարով՝ մինչև մեկ տարի ժամկետով օգտագործման իրավունքի պայմանագրերին համապատասխան՝ առանց աճուրդի:
Պարոն Մարկոսյանը նշել է, որ հանրակրթական ոլորտում գործունեություն ծավալող պետական ոչ առևտրային կազմակերպության գույքն աճուրդով` մինչև մեկ տարի ժամկետով վարձակալության կարող է տրամադրվել իրավաբանական և ֆիզիկական անձանց՝ կրթական, գիտական, մշակութային, մարզական, բնապահպանական, սոցիալական գործունեություն ծավալելու նպատակով: Խոսքը վերաբերում է դպրոցների տարածքներում տարբեր տեսակի արտադրությունների կազմակերպմանը, որն ամենևին կապ չունի դպրոցական ծրագրերի հետ:
Ա.Մարկոսյանը հայտնել է, որ նախատեսվող փոփոխությունների արդյունքում կուժեղացվի հսկողությունը տարածքների վարձակալության նկատմամբ:

Մանրամասները` աուդիոնյութում