երեքշաբթի, 28 օգոստոսի 2012
«Եկամտային հարկի մասին» ՀՀ նոր օրենքն ուժի մեջ է մտնելու 2013 թվականի հունվարից 1-ից
«Եկամտային հարկի մասին» ՀՀ նոր օրենքով միավորվել են եկամտահարկը, պարտադիր սոցիալական ապահովության և անհատական սոցիալական ապահովության վճարները ու դարձել մեկ` «Եկամտային հարկ»: ՀՀ կառավարությունում տեղի ունեցած մամլո ասուլիսում ՀՀ աշխատանքի և սոցիալական հարցերի նախարար Արտեմ Ասատրյանը տեղեկացրել է, որ կենսաթոշակային բարեփոխումների շրջանակներում ընդունված նոր օրենքն ուժի մեջ է մտնելու 2013 թվականի հունվարից 1-ից:
«Այդպիսով խնդիր է դրված օպտիմալացնել գործատուների հաշվետվությունները, որոնք բացառապես լինելու են էլեկտրոնային եղանակով: Դա նշանակում է, որ այսուհետ գործատուները պարտադրված չեն լինի այցելել հարկային մարմիններ»,- ասել է Ասատրյանը՝ պարզաբանելով նաև, որ «Եկամտային հարկի մասին» ՀՀ օրենքով աշխատավարձերի իջեցում չի ենթադրվում: Նրա հավաստմամբ՝ աշխատողին վճարվող դրույքաչափային աշխատավարձի տնoրինվող եկամուտը 2013-ի հունվարին չպետք է պակաս լինի 2012-ին վճարված փաստացի աշխատավարձից:
ՀՀ ֆինանսների նախարար Վաչե Գաբրիելյանի խոսքով` այս օրենքի համաձայն՝ 2013-ի հունվարին յուրաքանչյուր աշխատող չպետք է պակաս գումար ստանա քան ստանում էր 2012-ի դեկտեմբերին: «Եթե տեղի կունենա այդպիսի բան, ապա հարկային մարմինը կիրականացնի վերահսկողություն: Օրենքն այնպես է մշակվել, որպեսզի աշխատակիցների փաստացի իրական եկամուտները չպակասեն»,- ընդգծել է ՀՀ ֆինանսների նախարարը:
