չորեքշաբթի, 14 նոյեմբերի 2012
Խորհրդարանական կառավարման ժամանակը
Եթե այն վրա հասնի, ապա, ՀՀԿ փոխնախագահ Ռազմիկ Զոհրաբյանի կանխատեսմամբ, ընդդիմադիր ուժերի մեջ կռիվ կընկնի, թե ով պետք է զբաղեցնի վարչապետի աթոռը («Իրավունք – հետաքննություն»): Առայժմ ընդդիմությունը մեկ անգամ ևս ցույց է տալիս, որ դեմ չէր լինի նախաձեռնել կառավարությանն անվստահություն հայտնելու գործընթացը: Ավելի ճիշտ, ընդդիմությանն այդ մտքին է «հանգեցնում» «Ժամանակը»` հիշեցնելով, որ «կառավարությանը անվստահություն հայտնելու որոշման նախագիծ ներկայացնելու համար անհրաժեշտ է պատգամավորների ընդհանուր թվի մեկ երրորդի ստորագրությունը, իսկ ԲՀԿ-ն ընդդիմադիր կուսակցությունների հետ միասին դա կարող է անել»:
Իսկ եկող տարվա բյուջեի քննարկումը մոտենում է վերջնագծին. «Տնտեսական աճը կազմել է 6.2 տոկոս» («ՀՀ»), «Բյուջեի նախագիծը հատում է եզրագիծը» («ՌԱ»), «Խնամիներով վախեցան գալ» («Ժողովուրդ»), «Պարոնայք, դուք ձեզ ձե՞ռ եք առնում» («ՀԺ»-ի վերնագիրը փոխ է առնված Հրանտ Բագրատյանի բացականչությունից): Նույն «ՀԺ»-ն, «Ժողովուրդը» և «Ժամանակը» շատ են անհանգստացել ԱՄՀ-ի այն զեկույցից, որը ցուցադրում է տնտեսության ստվերայնության աստիճանը. Հայաստանը զբաղեցնում է «ամենավատթար դիրքերը»: Չի մոռացվում նվազագույն աշխատավարձի խնդիրը` «Հայոց աշխարհ», իսկ «Առավոտի» թոշակառու նամակագիրները պահանջում են «գոնե ամեն տարի փոխհատուցել գնաճը». այս համատեքստում «ՀԱ»-ն հիշեցնում է, որ եկող տարի «կենտրոնական բանկի միջին աշխատավարձը կդառնա 500 հազար դրամ»:
«Հրապարակը» ենթադրում է, որ այս օրերին Երևանում գտնվող ռուսական «Իտերայի» փոխնախագահ Գագիկ Մարտիրոսյանը «գուցե նաև» հանդիպել է վարչապետին` դրանից հետևցնելով նորանոր ենթադրություններ: «Օրակարգը» ուշադրություն է դարձրել այն հանգամանքին, որ կառավարության վաղվա նիստում քննարկվելու են հարցեր, որոնք ներկայացրել է կառավարության աշխատակազմի «Օրենսդրական կարգավորման ազգային կենտրոն» պետական հիմնարկը:
