երեքշաբթի, 18 դեկտեմբերի 2012
Տարեմուտի մեսիջներ
«Դե ֆակտո իրատեսը», վարչապետից ստանալով ԱՄՆ փոխնախագահի հետ ունեցած հանդիպմանը վերաբերող իր հարցերի պատասխանները, հավաստիանում է, որ «Ջո Բայդենն աջակցություն է հայտնել Հայաստանում ընթացող բարեփոխումների ընթացքին, երկկողմ հարաբերությունների զարգացման ծրագրերին»: Ավելին, այս մեսիջներին եկող գարնանը կարող են գումարվել նորերը. վարչապետը կրկին ԱՄՆ-ում անդրադառնալու է տնտեսական բարեփոխման ընթացքին: Ամերիկյան այցի արդյունքներից մեկին է անդրադարձել «Ազգը»` «ԱրմԹեք 2012» համաժողովը կամ ո՞րն է 21-րդ դարի տնտեսություն ունենալու «բաղադրատոմսը»: Նույնիսկ «Հրապարակը» չի ժխտում , որ ՀՀ վարչապետին «այնտեղ» բացառիկ ջերմությամբ են ընդունել, որ այցն «իր տեսակով աննախադեպ է եղել»: Առհասարակ, ինչպես ԱԺ փոխնախագահ Հերմինե Նաղդալյանն է «Առավոտի» միջոցով «ընդդիմադիրներին հասկացրել», հանրապետականի բոլոր գործերը, թե՛ ներքին, թե՛ արտաքին քաղաքական շեշտադրումները «ընդհանուր քննարկման, վերլուծության արդյունք են»: Դրա վկայությունն է, ըստ Նաղդալյանի, ՀՀ նախագահի ելույթը ՀՀԿ համագումարոմ: «Դե ֆակտո իրատեսի» գնահատմամբ, «գործող իշխանությունը, ի դեմս նախագահ և վարչապետ Սարգսյանների, մրցակից չունի գոնե աշխարհաքաղաքական կենտրոնների հետ հարաբերություններ հաստատելու և շարունակաբար զարգացնելու ներուժի մասով»:
«ՀԺ»-ն իր ընթերցողներին խորհուրդ է տալիս «լավ բան չսպասել» ԱԺ-ում քննարկվող «Շրջանառության հարկի մասին» ՀՀ օրենքի ընդունումից, իսկ «Իրավունքի» վկայությամբ «նոր հարկատեսակից արդեն դժգոհում են»:
Կրթության ոլորտի փորձագետ Անահիտ Բախշյանն «Առավոտում» դժգոհություն է հայտնում հանրակրթության որակի անկումից և վարչապետին խնդրում «Գիտելիքների գնահատման և թեստավորման կենտրոն» ՊՈԱԿ-ի գործունեությանը տալ «հրապարակային գնահատական», որպեսզի արդյունքում ունենանք «նորացված ԳԹԿ»:
Մնացած նյութերի գերակշիռ մասը վերաբերում է ԱԺ էթիկայի հանձնաժողովի հարցին, որին անդրադարձել են «Ժամանակը», «Ժողովուրդը», «Հրապարակը», «168 ժամը», «Օրակարգը», «Գոլոս Արմենիին»:
