հինգշաբթի, 27 դեկտեմբերի 2012
«Ուրախ երգ ու պար ձեր ճաշասեղանին»…
Ամանորի նախօրեին որոշ լրատվամիջոցներ «առանձնակի հուզականությամբ» են անդրադարձել տարբեր գերատեսչությունների ղեկավարների տարեմուտի «ամփոփիչ» մամուլի ասուլիսների մանրամասներին: «Տարին հաջող էր Դավթյանի համար». գրել է «Օրակարգը» և հավելել, որ «Էկոնոմիկայի նախարարը տնտեսությունում դրական դինամիկա է նկատել», ինչին, ասես հակառակվելու մղումով, «Հայկական ժամանակը» հակադարձել է` «Հավեսով վերջանում ենք»: «Առավոտը» լրագրողների հետ Արդարադատության նախարարի երեկվա «առանց փողկապի» հանդիպմանն արձագանքել է «Համակարգը դառնալու է «այլ համակարգ» հրապարակմամբ», «Ժամանակը» հայտարարել, թե «Բնապահպանության նախարարն ու իր աշխատակիցներն իրավունք չունեն զբաղվելու բնապահպանությամբ»: «Օրակարգի» փոխանցմամբ տարեվերջի կառավարության նիստում ներկայացվող նախագծերից մեկի հաստատմամբ փաստորեն «գործադիրը հստակեցնում է պարտադիր կենսաթոշակային ֆոնդերի ակտիվների ներդրման սահմանաչափերը», թեև, ըստ թերթի, «ռիսկերը, այդուհանդերձ, պահպանվում են»: «Հայկական ժամանակը» նիստի հաստատմանը ներկայացված մի այլ` երեխաների պաշտպանության 2012-2013 թթ. ռազմավարական ծրագրի առիթով նշել է, թե իբր դրանում ներկայացված «վիճակագրական տվյալների մեծագույն մասը» նախորդ տարիների հետազոտությունների արդյունք են:
«Ժամանակը» նկատել է, որ այս օրերին «գրեթե բոլոր ծերանոցներում էլ համեստ հյուրասիրություն կազմակերպվում է, բայց, իհարկե, սեփական միջոցներով» («ՀՀ կառավարությունը, ընդդիմությունը, իշխանությունը` բոլորը մոռացել են, որ ծերանոցներում էլ է ամանոր»): «Հրապարակի» տեղեկությամբ նախորդ օրը «Ռենեսանս» ռեստորանային համալիրում տեղի ունեցած տոնախմբության ժամանակ «ոչ անհայտ ՀՀԿ-ականներ Մուրադ Մուրադյանը ու Վահրամ Բաղդասարյանը» թունդ վեճի են բռնվել և «իրար մի լավ քաշքշել»: Տհաճ միջադեպին արձագանքել է նաև «Հայկական ժամանակը»` «Անարգել ծեծում են իրար»: «Հայոց աշխարհը» կանխատեսել է, թե «երկարաժամկետ հատվածում դրամն արժեզրկվում է», «Հրապարակը»` «Հայաստանի շուրջ և հայկական շահերին առնչվող» անցնող տարվա արտաքին քաղաքական զարգացումների վերաբերյալ դատողությունները արծարծել «Ճամփաբաժանին» հոդվածում:
