չորեքշաբթի, 9 հունվարի 2013
Նախորդ տարվանից փոխանցված թեմաներ
Այդպիսին է «Արևե՞լք, թե՞ Արևմուտք» թեման, որին անդրադառնում են «Ժամանակը» («Ռուսաստանին պետք է ասել «ոչ». եվրասիական միությունը «դամոկլյան սուր» է դարձել ՀՀ համար») և «Առավոտը» («Ոչ թե բոյկոտ, այլ «սովորական դասալքություն»): Ներքաղաքական հարցերի վերլուծությունը «ՀԺ»-ում շարունակում է Նիկոլ Փաշինյանը` «Քաղաքական տարին մեկնարկելիս»: Նույն թերթը «փաստական» սխալներ է հայտնաբերել ՀՀ նախագահի ամանորյա ուղերձում, ինչպես նաև արձանագրել ՀՀ ֆոնդային բորսայում դրամի «կտրուկ արժեզրկումը», երկաթգծի ուղևորափոխադրման սակագների նույնքան «կտրուկ» մեծացումը: «ՀԱ»-ն իր հերթին անհանգստացել է, որ հարկային բեռի ծանրացման հետևանքով «թանկանում է ծխախոտը»: Իսկ ահա առողջապահության նախարարն արդեն հասցրել է խորհրդակցություն անցկացնել և «առանձնացնել տարվա կարևոր անելիքները» («ՀՀ»): Այս թերթը նաև վստահեցրել է, որ «նոր ԱԷԿ-ը կնախագծվի ամենայն մանրամասնությամբ, որպեսզի հավանական բոլոր ռիսկերի պարագայում շարունակի անվտանգ շահագործումը»:
