Հայաստանի Հանրապետության Կառավարություն

Եթե հավատանք Վրաստանի ներկա նախագահին և նախկին մի քանի պաշտոնյաների, ապա Վահագն Չախալյանի հանցագործություններն անթիվ են. նման մարդուն ազատ արձակելը վնասում է հարևան երկրի ազգային, պետական և այլ շահերին: Խնդրին անդրադարձել են գրեթե բոլոր թերթերը` «Վիրահայոց թեմը դատապարտում է, իսկ Սաակաշվիլին սկսել է «չհասկանալ», «Սաակաշվիլին ինքն է ապացուցում Չախալյանի քաղբանտարկյալ լինելը» («Ազգ»), «Իմ գործը քաղաքական է». Վահագն Չախալյանը` Միխեիլ Սաակաշվիլու հայտարարության կապակցությամբ» («Առավոտ»), «Տափակ կենացներից գործի անցնելու ժամանակն է» («Հայացք»), «Այնպես է սիրում, որ նույնիսկ ուտել չի կարողանում» («Գոլոս Արմենիի») և այլն: Մամուլը նաև նշում է, որ այս խնդրում նույնպես Վրաստանի նոր կառավարության դիրքորոշումը հստակ է և սկզբունքային:
Լրատվամիջոցները ողջունում են ՀՀ նախագահի երեք թեկնածուների համատեղ հայտարարությունը` այն գնահատելով իբրև «աննախադեպ» իրադարձություն («168 ժամ»): Նախընտրական ծրագրերը նույնպես թերթերի ուշադրության կենտրոնում են. «Արդյունաբերությունը` երկրի կայուն տնտեսության հիմք. այն ամրացնելու համար ինչ են առաջարկում թեկնածուները» («ՀՀ»), «Տնտեսությունը կապաքրեականացնի, 10% աճի կհասցնի, ՓՄՁ-ի առաջ էլ կանաչ լույս կվառի»- Րաֆֆի Հովհաննիսյանի մասին գրում է «Առավոտը», իսկ «ՀԺ»-ն և «168 ժամը», բնականաբար, քննադատում են գործող նախագահի պաշտոնավարման օրոք ձեռք բերված ցուցանիշները:
Վերլուծելով վիճծառայության հրապարակած տվյալները, «ՀԱ»-ն նշում է, որ դրանք տարվա ընթացքում այնքան են փոխվել, որ «այս համակարգի նկատմամբ անվստահության» պատճառ են դարձել: «Ազգը» պետական մարմինների անգործությամբ է բացատրում «տաքսիների կատարյալ խառնաշփոթը»` «Ապօրինի տաքսիներից մինչև խաբող հաշվիչներ», և առաջարկում արմատական փոփոխություններ կատարել: «ՀԺ»-ն փոխանցում է ատամնաբույժների հավաքի մասնակիցների մտադրությունը` իրենց պահանջը ներկայացնելու ՀՀ ղեկավար մարմիններին, այդ թվում` վարչապետին: «Կասեցրեք բարբարոսությունը», այս կոչով երկրի ղեկավարներին են դիմել մի խումբ մտավորականներ. խոսքը դարձյալ վերաբերում է Կենտրոնական ծածկած շուկային, որտեղ, նամակագիրների վկայությամբ, բազում իրավախախտումներ են կատարվում: