Հայաստանի Հանրապետության Կառավարություն

«Առաջիկա հնգամյակը Հայաստանի զարգացման համար բեկումնային է լինելու», - ազդարարում է «Դե ֆակտո իրատեսը» և հավելում. «Սերժ Սարգսյանն ու նրա թիմի առանցքային գործիչները հնարավորություն ունեն իրենց անունը ոսկե տառերով գրելու պատմության դասագրքերում»: Թերթը, բնականաբար, հանգամանորեն հիմնավորում է նշված հայտարարությունները: Մեծ արձագանք են ստացել նաև ՀՀ նախագահի և ՀՀ վարչապետի` ռուսական ԶԼՄ-ներին տված հարցազրույցները («Առավոտ», «168 ժամ», «Ազգ»), ինչպես նաև «Մոսկովսկիե նովոստիում» տպագրված «Հայաստան. հետճգնաժամային վերելք» հոդվածը, որը կրճատումներով արտատպել է «Նովոյե վրեմյան»:
«Արտաքին պարտքը գնալով ավելանում ու ավելանում է», - զգուշացնում է «Ժողովուրդը», - այն արդեն ՀՆԱ-ի 42,6 տոկոսն է: Ասես պատասխանելով այդ մտահոգությանը, ՀՀ ֆինանսների նախարարի տեղակալը հայտարարում է. «Հայաստանը դասվում է նվազ պարտքի բեռ ունեցող երկրների շարքը, և պետական պարտքի կառավարման տեսակետից որևէ ռիսկ առայժմ տեսանելի չէ» («ՀՀ»):
ԱԺ-ում նույնպես գործընթացը ծավալվում է «իր կարգով»: Այսուհետև բռնադատվածներին գրավի դիմաց և առևտրային բանկերից արտոնյալ վարկ տրամադրելու կառավարության օրենսդրական փոփոխությունն, օրինակ, ԱԺ նախագահն, ըստ «Ազգի», հարցի լուծում չի համարել. «… պետք չէ քաղաքացուն ուղարկել մասնավոր բանկ, իսկ պետությունը մնա դիտողի դերում», - ասել է խորհրդարանի խոսնակը:
Խորհրդարանի շենքի առջև օրենքով սահմանված արտոնագրային նոր վճարներից դժգոհ ատամնաբույժների երեկվա ցույցին անդրադառնալով, «168 ժամը» գրել է, թե նրանք «կլքեն երկիրը», «Ժամանակը» հավելել է, թե «Ատամնաբույժները պայքարում են ձևավորվող նոր մենաշնորհի դեմ», «Առավոտը»` փոխանցել նրանց մի մասի «վստահեցումը», թե իբր իրենց նկատմամբ «արդեն առողջապահության և հարկայինի աշխատակիցները «ռեպրեսիաներ են» սկսել»: Թեման արծարծել է նաև «Ժողովուրդը»` «Կառավարության պայքարն ատամնաբույժների դեմ»:
Ըստ «Հայկական ժամանակի» Սյունիքի մարզի արոտավայրերից 50 հազար հեկտարը իրանցի ֆերմերին տրամադրելու պատմությունը «թափ է հավաքում» («Մութ ոչխարներ Սյունիքում»): «Օրակարգը» մեկնաբանել է ԱՎԾ-ի 2013 թ. հունվար ամսվա սպառողական գների աճի ցուցանիշները («Դեկտեմբերյան գնաճը տեղափոխվել է հունվար»), մի այլ հրապարակման մեջ նաև նշել, որ «պետբյուջեի հարկային եկամուտներում» բանկերն «առաջանցիկ են» և «ավելացրել են իրենց մասնաբաժինը»: «Գոլոս Արմենիին» արձագանքել է ՊԵԿ-ի օրերս հրապարակած 1000 խոշոր հարկատուների ցուցակին` «Պետբյուջեի «պատվո» պահակազորը», «Հայոց աշխարհը» տեղեկացրել, որ խոշոր ընկերություններում «օրենսդրորեն պարտադրված» աուդիտի արդյունքում «256 ընկերություն չի ստացել … դրական կարծիք»: