շաբաթ, 9 փետրվարի 2013
Համատեղ կառավարմանը պատրաստ են
«Կոալիցիա» եզրույթը» ԲՀԿ մամուլի խոսնակի ականջին չգիտես ինչու մի քիչ «խորթ է հնչում», բայց նրա կուսակցությունը «համատեղ կառավարմանը»` խնդրեմ, «միշտ պատրաստ» է, միայն թե սրբությամբ կատարի ընտրողի պատվիրանները («Ժամանակ»): Թերթը նաև կարծում է, որ ԲՀԿ-ի վերադարձը իշխանական կոալիցիա «զգալիորեն կհեղինակազրկի» այս կուսակցությունը:
«Հրապարակին» շարունակում են հուզել «կադրային վերադասավորումները», «Ժողովուրդը» մտահոգված է «կառավարության որոշմամբ» ձեռք բերված երկու բիոզուգարանի թանկությամբ, պաշտոնյաների «ոչ այնքան հասկանալի» գործուղումներով, ինչպես նաև ձկնաբույծների չլուծված խնդիրներով, «168 ժամը»` այն իրողությամբ, որ ՀԱԿ-ը «ինքն է դառնում Հայաստանից արտագաղթի ալիքին նպաստող հիմնական ուժերից մեկը»:
Հայագետ Արգամ Այվազյանը այս անգամ «Ազգում» վերստին արծարծում է «Նախիջևանի պատմաճարտարապետական հուշարձանների վերաբերյալ իր ունեցած արխիվի նյութերը գնման միջոցով պետականացնելու խնդիրը»:
«Հայկական ժամանակը» «թարմացրել է» գազի թեման («Էլի թանկացել է». «Ո՞վ է փակելու 140 միլիոն դոլարը»), որին միացել է «Հայոց աշխարհը» գրելով, թե «Մինչ խոստանում են լավագույն գինը», կապույտ վառելիքի «մաքսային արժեքը հասել է 254 դոլարի»: Ըստ «Նովոյե վրեմյայի» Առողջապահության նախարարությունը չի կարողանում «զսպել դեղերի գները» «մեխանիզմներ չլինելու» պատճառով: «Հայոց աշխարհը» ներկայացրել է առաջարկներ, թե «ինչպես կասեցնել կեղծ դեղորայքի գրոհը»:
