չորեքշաբթի, 20 փետրվարի 2013
Հետընտրական կանխատեսումների օրակարգը
«Հայոց աշխարհի» տեղեկությամբ «Սոցփաթեթն ընդլայնվում է». թեև ներդրման առաջին տարվա արդյունքներն այնքան էլ գոհացուցիչ չեն, այդուհանդերձ «կառավարությունը մտադիր է… համակարգում ներառել ևս 30 հազար աշխատողներ»: «Ռեսպուբլիկա Արմենիան» ներկայացրել է Երևանի մաքուր երկաթի գործարանում ընթացող գործընթացները` «Արտահանմանը նպատակաուղղված»: Մի այլ հրապարակման մեջ թերթը հավուր պատշաճի լուսաբանել է ձևավորված «արդյունաբերության աջակցման գործիքակազմի» նշանակությունն ըստ ոլորտների: «Օրակարգի» մտահոգությանը, որ թեև «համաշխարհային շուկայում գների աճի պայմաններում ներկրված ցորենի մաքսային արժեքն աճել է 8%-ով, մանրածախի գինը նույնիսկ նվազել է», սակայն «թանկացել են ալյուրը և հացը», ըստ «ճաշակի յուրո» և «հետընտրական շեշտադրումով» միացել է «Հայկական ժամանակը» և կանխատեսումներ արել, թե «շուտով կհայտարարվի գազի գնի բարձրացման մասին», հետո «կբարձրանա … տրանսպորտի գինը», «ներկրվող ապրանքների գները» և … այսպես շարունակ («Պախմելը» ծանր է լինելու»):
«Առավոտի» հետ զրույցում գյումրեցի քաղաքագետ Գագիկ Համբարյանը Գյումրի քաղաքում նախագահի ընտրության արդյունքներին իր անդրադարձում ներկայացրել է սեփական դատողությունները «իշխանությունների` Շիրակի մարզում իրականացրած սոցիալ-տնտեսական ոչ ճկուն քաղաքականության» և տրանսֆերտների վերաբերյալ («Նախագահը նեղանալու փոխարեն` ճիշտ կանի իր մեղքը փնտրի»): «Ժամանակում» ԱԺ պատգամավոր Գարեգին Նուշիկյանը նշել է, որ հատկապես տնտեսական ոլորտում սպասվում են դրական փոփոխություններ, քանի որ «սոցիալ-տնտեսական այս վիճակը մեղմելու համար անմիջապես քայլեր պետք է ձեռնարկվեն»:
«Օրակարգը» գրել է, թե «մինչ կառավարությունը զբաղված է» «Նաիրիտի» արտադրական համալիրի «վերագործարկման ուղղությունները հստակեցնելով», «խնդիրներն ավելի են խորանում» («Խճճել «Նաիրիտը»): Թերթը մի այլ հրապարակման մեջ փոխանցել է «Սթար» սուպերմարկետների ցանցի նախկին տնօրեն Վահան Քերոբյանի տեսակետը, որ «Carrefour-ը կարող է էապես փոխել շուկան»:
