շաբաթ, 23 փետրվարի 2013
Վարչապետի թեկնածուների հերթական «շքերթը»
Թեման հանգիստ չի տալիս «Ժամանակին»: Այս թերթը վարչապետի փոփոխությունը տեղադրում է «հասարակության դրական սպասումների» հատվածում և մեկ առ մեկ քննարկում վեց լուսանկարներում պատկերված գործիչների հնարավորությունները:
Ընդհանուր առմամբ այսօրվա տպագիր մամուլում գերակշռում է երկրի տնտեսական վիճակի «մինորային» գնահատականը. «Թոշակ չբարձրացնելը թանկ նստեց իշխանության վրա» («168 ժամ»), «ՀՀ կառավարությունը չի մտածում գյուղացու մասին» («Ժողովուրդ»), «Հայաստանի քաղաքացին վատ է ապրում, պարոն նախագահ» («Հրապարակ»), «Գներ և եկամուտներ» («ՀԺ». թերթն ապացուցում է, որ վերջին 5 տարում ապրանքի և մթերքի գները բարձրացել են 70-80 տոկոսով, բնակչության մոտավորապես նույնքան տոկոսն էլ «սրընթաց տեմպով» աղքատանում է»), «Բյուջեն օգտագործվում է բանկերն հարստացնելու համար» («ՀԱ». վարկերն էժանացնելու քայլեր ձեռնարկելու փոխարեն կառավարությունը ստանձնել է դրանց «տոկոսադրույքների մարման պատասխանատվությունը»): Եվ միայն «Ազգը», անդրադառնալով նախագահի ընտրության թեմային, գրում է. «Սոցիալական ծրագրերը պետք է արտացոլվեին ընտրության արդյունքի վրա, անհնար է գողանալ հարյուրհազարավոր ձայներ և ստանալ միջազգային դիտորդների դրական գնահատականը»:
Շիրակի մարզպետը հրաժարականի դիմում է ներկայացրել վարչապետին. փաստը մեկնաբանում են «Առավոտը», «ՀԺ»-ն, «Ժամանակը» և «Ժողովուրդը»:
