Հայաստանի Հանրապետության Կառավարություն

Ըստ «Հրապարակի» լուրերի այս անգամ փոխվարչապետի պաշտոնն զբաղեցնելու է Գագիկ Խաչատրյանը, ԿԲ նախագահինը՝ Վաչե Գաբրիելյանը. «Արթուր Ջավադյանի ճակատագիրը» թերթը չի կարողացել պարզել։
«Ռեսպուբլիկա Արմենիան» անդրադարձել է արտահանման զարգացմանը միտված ռազմավարական հիմնախնդիրներին ու կատարված աշխատանքներին՝ «Նվաճումներից դեպի նոր մարտահրավերներ»։ «Հրապարակի» հետ զրույցում ԱԺ պատգամավոր Հրանտ Բագրատյանը ողջունել է նվազագույն աշխատավարձի բարձրացման նպատակով կառավարությունում տեղի ունեցող քննարկումները, միաժամանակ նշել, որ դա «հստակ տնտեսական քայլ է, որը կարող է զգալիորեն կարգի բերել եկամտահարկի բլոկը և այդ մասով էականորեն կրճատել ստվերը»։
«Օրակարգը» հիշատակել է ԱՎԾ հրապարակումը (ըստ «Սպառողական գների ինդեքսը ՀՀ-ում հունվար-մարտ» տեղեկատվության՝ մարտին 12-ամսյա գնաճը կազմել է 3,4%) և հավելել, որ ԿԲ-ն համարյա չի շեղվել գնաճի կանխատեսումներում՝ 3,5%։ Մի այլ հոդվածում («Օֆշորներից քաշվածը») թերթը տեղեկացրել է, որ «Հայբիզնեսբանկը խնդիրների պատճառով վաճառել է քառորդ բաժնեմասը»։
«Հայկական ժամանակն» այս տարվա առաջին երկու ամիսներին արձանագրված բյուջետային մուտքերին անդրադարձը խորագրել է «Ծիծիլյոնանիշ թվեր», «Օրակարգը» հավելել է, թե «կառավարությունը չի շեղվում զսպողական հարկաբյուջետային քաղաքականությունից», «պետությունը մի կողմից… տնտեսությունից քաշում է դրամական միջոցներ, մյուս կողմից՝ դրանք ծախսերի տեսքով չի ուղղում տնտեսություն»։
Ըստ «Հայոց աշխարհի» թեև «ներդրումների տեսքով արտերկրից Հայաստան մտնող ֆինանսական հոսքերն առաջին հայացքից բավական մեծ են», սակայն «տնտեսության մեջ ներդրողներին փոխարինում են վարկերը»։
«Արմավիա» ավիաընկերության ճակատագրին հետամուտ հրապարակումներում շարունակվում են «նոր բացահայումներ» ներկայացվել. «Սնանկ «Արմավիա»-ն ու բարկացած քաղաքացիները» և «Հայաստանի ավիացիան ուներ փայլուն անցյալ, ունի ծանր ներկա. մի զրկեք նրան ապագայից» («Ազգ»), «Ճիշտ լուծումը» («Հայկական ժամանակ»), «Արմավիա»-ն չի շտապում սնանկանալ» («Օրակարգ»), «Արմավիայի սնանկացմամբ գործազուրկ կդառնան ընկերության մոտ 400 աշխատակիցներ»։