հինգշաբթի, 4 ապրիլի 2013
Տնտեսության գնահատականը
«Հայոց աշխարհը» և «Հայկական ժամանակը» անդրադարձել են կառավարության այսօրվա նիստի օրակարգում ընդգրկված մի քանի հարցերի: «Ժողովուրդը», վկայակոչելով ԱՎԾ հրապարակած տվյալները, նշել է, «Հայաստանի արտաքին պարտքն աճել է», և դրա «առյուծի բաժինը գոյացել է բանկերում»: «Օրակարգը» հավելել է, թե «Գործազրկությունը նվազում է աշխատատեղերի հետ միասին», գործազրկության մակարդակի նվազումն ու զբաղվածության մակարդակի ավելացումը արդյունք է «ոչ թե 7,2% տնտեսական աճի, այլ արտագաղթի», մի այլ հրապարակման մեջ էլ հայտնել իր մտահոգությունը, թե «համաշխարհային շուկայում մետաղների գների անկումը հանգեցրել է Հայաստանում հանքերի ավելի ինտենսիվ շահագործման»:
«Վարչապետը դիմում է կտրուկ քայլերի՞», - հարցրել է «Գոլոս Արմենիին», անդրադառնալով անշարժ գույքի գնահատման ոլորտում առկա խնդիրների, առևտրային բանկերի կողմից դրանց գնահատման ցածր գների վերաբերյալ վարչապետ Տիգրան Սարգսյանի հանձնարարականներին: Մեկ այլ հրապարակմամբ թերթը հարցազրույցի է հրավիրել Եվրասիական զարգացման բանկի վարչության նախագահի տեղակալ, հակաճգնաժամային ֆոնդի կառավարիչ Սերգեյ Շատալովին, ում գնահատմամբ «Հայաստանը չի կարելի դասել ցածր վճարունակությամբ թույլ տնտեսություն ունեցող երկրների շարքին, ավելին, Եվրասիական զարգացման բանկը ներդրումային նշանակալի հնարավորություններ է տեսնում Հայաստանում, և մեր գնահատականները համընկնում են միջազգային այլ կառույցների, մասնավորապես, Արժույթի միջազգային հիմնադրամի կարծիքի հետ»:
Ըստ «168 ժամի» «անցնող շաբաթվա տնտեսական ամենատարօրինակ ու նույնքան կարևոր թեման «Արմավիայի» վախճանն էր`… սնանկացման գործընթացի սկիզբը» («Միկայի անհավանական արկածները»), ինչին իր հերթական անդրադարձը «Ժողովուրդը» խորագրել է «Սնանկ ապահովություն»:
«Հրապարակը» «համադրել» է իր ունեցած տեղեկությունները և եզրակացրել, որ «Ռուսները հետևելու են «Նաիրիտի» գործով» ՀՀ դատախազությունում ընթացող քննության ընթացքին, «Ժամանակը» «ՀԱՊԿ անդամ երկրների անվտանգության վրա» համաշխարհային տնտեսական ճգնաժամի հնարավոր բացասական ազդեցության վերաբերյալ ՀԱՊԿ գլխավոր քարտուղարի հայտարարությունը որակել է «Բորդյուժայի բազմիմաստ ակնարկներ», «168 ժամը»` վերստին անդրադարձել ՌԴ կառավարության «Հայրենակիցներ» ծրագրի տխուր հետևանքներին և ներկայացրել առաջարկություններ:
