ուրբաթ, 12 ապրիլի 2013
Նոր կառավարությանն սպասելիս
«Ժողովուրդի» դիտարկմամբ երեկ «հրաժարական» էին տվել նաև կառավարության շենքի առջևի բողոքավորները. «միգուցե նրանք հրաժարական ներկայացրած կառավարությունից որևէ ակնկալիք չունեն»: Իսկ ԱԺ հարցուպատասխանը, այնուամենայնիվ, տեղի է ունեցել. վարչապետի պաշտոնակատարը կառավարության ամենալուրջ թերացումներից մեկը համարել է այն, որ գործադիրը չի կարողացել ընդդիմությանը (Զարուհի Փոստանջյանին) համոզել, որ իր ախտորոշումներն իրականությանն ավելի մոտ են, քան նրան(ց)ը («ՌԱ»): Մամուլից նաև պարզվում է, որ «ԲՀԿ-ն վարչապետի ու ոստիկանապետի պաշտոնանկության պահանջ չունի» («Հրապարակ»), որ «պետք է փոխել ոչ թե կառավարությունը, այլ գործիքները, մեխանիզմները» («Իրատես դե ֆակտո»). «ՀԱ»-ն էլ թվարկել է այն առաջնահերթությունները, որոնց «լուրջ ուշադրություն պետք է դարձնի հերթական կառավարությունը»:
«Օրակարգը», «Հրապարակը», «ՀՀ»-ն, «Իրատես դե ֆակտոն» անդրադարձել են կառավարության երեկվա նիստի հարցերին, «Ազգը» ուշադրություն է դարձրել հիվանդների հոսքերը կարգավորելուն. «7-18 տարեկան սոցիալապես անապահով երեխաների բուժօգնությունը նույնպես կազատվի համավճարից»:
Եվրասիական միության հետ գործակցելու պայմանագրի ստորագրման («Ժամանակ») առիթով «Հրապարակը» տպագրել է «Եվրոպա՞, թե՞ Եվրասիա. փոխլրացման առավելությունները» հոդվածը: Վերնագրից անգամ երևում է, որ հարկավոր չէ հակադրել Եվրոպան ու Եվրասիան, այլ ըմբռնել, որ «Եվրասիական ինտեգրացումը Հայաստանին հավելյալ հնարավորություններ է ընձեռում»: Թեմային անդրադարձել է նաև «Իրատես դե ֆակտոն». «Նոր փուլ, որը պարունակում է ինչպես նոր մարտահրավերներ, այնպես էլ նոր հնարավորություններ»:
Եվ ինչպես միշտ` «Արմավիան». «Ի՞նչ է ուզում պարտակել քաղավիացիայի գլխավոր վարչությունը» («Իրավունք»), «Մասնավո՞ր, թե՞ պետական ավիափոխադրող» («ՀՀ»), «Արմավիայի տնօրենն ընդունում է` սնանկացման պատճառը վատ մենեջմենթն է» («Օրակարգ», «Առավոտ»): «Իրավունքի» կարծիքով «Արմավիայի» սնանկացման N1 մեղավորը Ռոբերտ Քոչարյանն է, «Ժողովուրդի» տեղեկությամբ կառավարությունը բանակցում է Հարություն Փամբուկյանի հետ, որպեսզի նա կազմակերպի ավիափոխադրումները:
