չորեքշաբթի, 17 ապրիլի 2013
Խոր և համապարփակ գնահատականները
«Օրակարգի» հրապարակումները տեղեկացրել են, որ «խոր և համապարփակ ազատ առևտրի գոտու համաձայնագրի շուրջ քննարկումներում» Հայաստանը «խնդիրների է առերեսվել» («ԵՄ-ն չի ասոցացնում կոնյակը»), որ ոսկու միջազգային գների անկմամբ պայմանավորված` կրկին առկա է «մյուս մետաղների գների նվազման վտանգը» և որ ԿԲ խորհուրդն իր երեկ կայացրած որոշմամբ «հերթական քայլն է ձեռնարկել` միտված դրամով վարկավորման ծավալների ավելացմանը», ինչը թերթը «դժվարացել է գնահատել»: «Ազգը» անդրադարձել է տնտեսության և անշարժ գույքի շուկայում տիրող վիճակի վերաբերյալ «Ակցեռն» գործակալության տնօրեն Հակոբ Բաղդասարյանի և ՀԳՀՄ նախագահ Գագիկ Մակարյանի գնահատականներին:
«Ժողովուրդին» հետաքրքրել են Աշխատանքի և սոցիալական հարցերի նախարարի պաշտոնակատար Արտեմ Ասատրյանի անցած աշխատանքային ուղու մանրամասները և սպասումները: Գյուղատնտեսության նախարարի պաշտոնակատար Սերգո Կարապետյանը «Առավոտում» անդրադարձել է նույն պարբերականում օրեր առաջ տպագրված «Պարոն նախարար, տասը չափեք, մեկ կտրեք» հոդվածին:
«Ազգը» արձագանքել է կայքերից մեկում «կարտոֆիլի ցեցի և կրճատված ցանքատարածությունների» վերաբերյալ Հրաչ Բերբերյանի հայտարարությանը և որակել «հերթական «փորձագիտական» եզրակացություններ»: «Հայկական ժամանակը» փորձել է պարզել, թե «Ինչու են դեղերը թանկ»:
