երեքշաբթի, 23 ապրիլի 2013
Ամեն ինչից խոսելու մարմաջը
Դրանով տառապողներից մեկը Գուրգեն Եղիազարյանն է, որը լրագրողներին այս էլ որերորդ անգամ տեղեկացրել է, որ վարչապետի նշանակումը տեղի է ունեցել իր կամքին հակառակ: Արտահայտելով այդ կարևոր միտքը, նա հընթացս անդրադարձել է այլ խնդիրների ևս՝ Երևանի ավագանու ընտրությունից մինչև «տարբեր մեծ ու փոքր տզրուկները» («168 ժամ»): Հանրության մեջ, սակայն, այլ կարծիքներ էլ կան, որոնք արտահայտված են նույն թերթում, «Իրավունքում» և այլ լրատվամիջոցներում: «Իրավունքը» հաստատելու պես հարցնում է՝ «ԲՀԿ-ն վերադառնո՞ւմ է կոալիցիա» և յուրովի բաժանում կառավարության մնացած պորտֆելները. «ԲՀԿ-ի համար սկզբունքային են սոցապ, քաղշինի և մշակույթի նախարարների» պաշտոնները, ի դեպ, մշակույթի նախարարի աթոռը ԲՀԿ-ն մտադիր է հանձնել նախկին նախարար Թամար Պողոսյանին: Թերթը չի բացառել, որ «փոխվարչապետը վերանշանակվի այդ պաշտոնում ԲՀԿ քվոտայով»: Պակաս հավաստի չէ նաև «Ժողովուրդի» աղբյուրը: Դրա համաձայն Արմեն Մովսիսյանը շարունակելու է ղեկավարել էներգետիկայի և բնական պաշարների նախարարությունը: Այս թերթը և «Օրակարգը» փոխանցել են «Թրանսփարենսի ինթերնեյշնըլի»՝ ՊԵԿ նախագահի դեմ հնչեցրած մեղադրանքը, թե նա ձեռնարկատիրությամբ է զբաղվում:
Տնտեսական տարբեր ցուցանիշներին են անդրադառնում «Օրակարգը», «Դելովոյ Էքսպրեսը», «Առավոտը», «Հայոց աշխարհը» և «Ազգը»:
Մամուլի աշխույժ արձագանքն են ստացել միջազգային կազմակերպությունների՝ օրերս հրապարակած զեկույցները՝ «Ժողովուրդ», «Առավոտ», «Իրատես դե ֆակտո» («Եթե Եվրամիությունն ընդունելի է, ապա անհասկանալի է Եվրասիական միության ստեղծմանը դեմ լինելը»):
Նշելով համաշխարհային ֆինանսական ճգնաժամի հինգ տարին, «Դելովոյ էքսպրեսը» հարցնում է՝ «Պատրա՞ստ ենք մենք արդյոք երկրորդ ալիքին»:
«Հատուկ «ՀԺ»-ի համար» հոդված է գրել Արթուր Բաղդասարյանը՝ «Հայաստանում անհրաժեշտ են փոփոխություններ»: Նույն հեղինակը «Առավոտի» ընթերցողին հայտնում է, որ ինքը «ներկայումս ձեռնամուխ է եղել աջակցելու նոր ժամանակակից և քաղաքակիրթ արհմիութենական շարժման ձևավորմանը»:
