չորեքշաբթի, 24 ապրիլի 2013
Կարևոր իրադարձությունների հերթականությունը
Գյումրու երեկվա դեպքերը, որոնց նկարագրությունը զբաղեցրել է մամուլի տարածքի առյուծի բաժինը («Ժողովուրդ» և այլն), ապացուցում են, որ ոչ Մեծ եղեռնի տարելիցը, ոչ հետընտրական-նախընտրական թոհուբոհը, չեն կարողանում «ստվերել» քրեական թեմայի գերակայությունը մեր կյանքում…
Ամեն դեպքում՝ այլ խնդիրների համար ևս որոշ տեղ մնացել է։ Վարդան Օսկանյանն, օրինակ, գլխովին զբաղված լինելով նախընտրական հոգսերով, ժամանակ է գտել խորհուրդ-առաջարկություններ տալու նոր կառավարությանը՝ «Աճ, թե խնայողություն. Օսկանյանի առաջարկները» («Օրակարգ»)։ Նույն թերթը հաշվարկել է, որ «Հյուսիս-հարավի չօգտագործված միջոցները կառավարությանը 256 հազ. ԱՄՆ դոլար են արժեցել». «Տույժ՝ տրանշի դիմաց»։
Եթե «ՀԱ»-ի դիտարկմամբ «շուկայում դոլարի ավելցուկ կա», ապա «ՀԺ»-ն դրամի վերջին արժևորումը «մեքենայություն» է համարում։ Ավելին, «փոխարժեքի տատանման վրա փող են վաստակում նրանք, ովքեր ընտրությունների շրջանում մեծ ծախս են անում և ապահովում ՀՀԿ-ի «հաղթանակը»։
«Հրապարակը», վկայակոչելով իր անանուն և անունով (Արծվիկ Մինասյան) աղբյուրները, գրում է, որ «շրջանառության հարկը նոր փորձանք է գործարարների գլխին»։ Նույն թերթը էկոնոմիկայի փոխնախարարի հետ զրուցում է սպասվող տեսչական բարեփոխման մասին և եզրակացնում՝ «Նախարարներին զրկում են տեսչություններ կոչվող յուղոտ պատառից»։
«Ժողովուրդը» վիճարկում է պաշտպանության նախարարի վերանշանակման արդարացիությունը, կառավարությանը մինչև աշուն ժամանակ տալիս «հստակ դրական ցուցանիշներ ապահովելու համար» և դժկամությամբ ընդունում «Երկրապահ» թերթի խմբագրությունը Մամուլի շենքում տեղավորելու կառավարության որոշման նախագիծը։
