Հայաստանի Հանրապետության Կառավարություն

Հանճարեղ Թումանյանի այս ասույթն, անկասկած, չի վերաբերում «փուչիկ» բառին, որն այնքան են սիրում մեր գործիչները: Օգտագործում են այն ժամանակ, երբ գիտելիքները «քչություն» են անում, կամ պարզապես ուզում են մի վատ բան ասել, բայց չգիտեն ինչ ասեն: Այս բառը, կարելի է ասել, Հրանտ Բագրատյանի բառապաշարի զարդերից է. վերջերս այն նեղն ընկած ժամանակ փոխ է առնում Նաիրա Զոհրաբյանը: Ասվածը վերաբերում է 7 տոկոս տնտեսական աճին և հանգամանորեն լուսաբանված է տպագիր և էլեկտրոնային մամուլում: Այսօր խնդրին անդրադարձել է «168 ժամը»: «Տնտեսական աճը փուչիկ չէ», ասում է պրոֆեսոր Վարդան Բոստանջյանը («Ազգ», «ԳԱ»), «Հ. Բագրատյանն իր ֆեյսբուքյան հայտնի գրության մեջ խառնել է դեֆլյատորը», նրան երկրորդում է ֆինանսների փոխնախարար Վարդան Արամյանը («ՀՀ»): Հետո՞ ինչ, րոպեական դադարից հետո ուշքի է գալիս «168 ժամը», «Իսկ այն, որ 7.2 տոկոս աճ ունեցող երկրում մարդկանց 40 տոկոսը պատրաստ է արտագաղթե՞լ». և այլն: Ի դեպ, ֆինանսների փոխնախարարն «անակնկալի է եկել»՝ իմանալով, որ «Շրջանառության հարկի մասին» օրենքի պատճառով շատ ԶԼՄ-ներ «տհաճ վիճակում են հայտնվել» («Ժողովուրդ», «ՀԺ», «Ազգ»):
Հայաստանի առաջին հազար հարկատուների վճարած հարկերի տվյալները, որոնք երեկ հրապարակել է ՊԵԿ-ը, «ՀԺ»-ին հիմք են տվել պնդելու, որ «հարկային եկամտի ավելացման բեռը փոքր բիզնեսի ուսերին է բարդվում»:
«Ժամանակը» տրտնջում է, որ բոլորն զբաղված են Երևանի ավագանու ընտրությամբ, և «Հայաստանի հասարակության համար կառավարության կազմավորման հարցը հրատապ չէ», «Ժողովուրդը» բանավիճում է իր նախկին նյութերի թեմաներով և, ցուցաբերելով վերլուծական անուրանալի հմտություն, ստուգում վարչապետի երեկվա հանդիպումներից մեկի հաղորդագրության համապատասխանությունը ՀՀ սահմանադրությանը, «Ազգը» փոխանցում է գիտնական Ռ. Ալանակյանի զգուշացումը նույնականացման քարտի վտանգից:
Եվ ինչպես միշտ՝ «Արմավիան». թեմային անդրադարձել են «Ժողովուրդը»՝ «Ո՞ւր են փողերը» և «ՀԱ»-ն՝ «Կհաջողվի՞ փրկել «Արմավիան». առողջացման ծրագիրը հավակնոտ է»: