հինգշաբթի, 2 մայիսի 2013
Մամուլի «զարմանահրաշ» հարցերը
«Ազգում» հրապարակված հոդվածում ներկայացվել են գործազրկության հաղթահարման ուղղությամբ կառավարության ձեռնարկված միջոցառումները (պետական համակարգում օպտիմալացման ծրագրերի մշակման նպատակով աշխատանքներ, նոր աշխատատեղեր ստեղծող ընկերություններին հարկային արտոնությունների սահմանում), նաև կարևորվել, որ «գործազրկության նվազեցումը և աշխատավարձերի առաջանցիկ բարձրացումը պետք է զուգակցվեն»: «Հայոց աշխարհն» անդրադարձել է «աշխատուժի պլանավորման բացակայության» տխուր հետևանքներին և առաջարկել լուրջ փոփոխություններ կատարել «համապատասխան օրենքներում» և «կոնկրետ նախարարությունների գործելաոճում»: Աշխատանքի թեման «մայիսմեկյան լույսի ներքո» արծարծել է նաև «Հայկական ժամանակը»՝ «Կենացների հարմար օր»:
«Ինչո՞ւ են հայերը փախչում 7,2 տոկոս տնտեսական աճով երկրից», այսպես է խորագրել «Առավոտը» Երևանի ավագանու ընտրության առիթով Մերգելյան ինստիտուտին հարակից այգում ԲՀԿ-ական խորհրդարանական Նաիրա Զոհրաբյանի ունեցած ելույթին իր անդրադարձը: Մի այլ հրապարակման մեջ թերթը փոխանցել է ՀԳՀՄ նախագահ Գագիկ Մակարյանի տեսակետը, ըստ որի «Թեկնածուները ճիշտ չեն ընկալում քաղաքի ղեկավարի դերը», ինչը իրականում «նրա տնտեսական նշանակությունն է»: «Ժողովուրդի» հետ զրույցում Արթուր Բաղդասարյանը նշել է տնտեսական քաղաքականության մեջ ՕԵԿ-ի ոչ մեծ դերակատարության մասին, նաև հավելել, որ կուսակցությունը վստահված ոլորտներում ինչքան որ կարողանում է, փորձում է անել:
