շաբաթ, 4 մայիսի 2013
Լավատեսության ավելցուկ
Դրական զգացողություն հարուցող նյութերն, իրոք, գերակշռում են: «ՀԱ»-ն, օրինակ, հույս ունի, որ «ներկա և նախկին վարչապետների ջրերը նույն առվով» կարող են գնալ. նկատի է առնվում օֆշորի գոտիներում գործող ընկերությունների գործունեության համատեղ կանոնակարգման մտադրությունը: Պրոֆեսոր Մանասերյանը նույնպես հույս ունի, որ վարչապետին «լավ աշխատեցնելու» համար պետք է մեծացնել հանրային պահանջկոտությունը՝ «Առավոտ»: «ՀԺ»-ն և «Ազգը» միահամուռ հայտնում են, որ վարչապետի և «Մայքրոսոֆթ» ընկերության տարածաշրջանային տնօրենի երեկվա հանդիպումը կարող է դրական արդյունք ունենալ: «ՀՀ»-ի հեղինակներից մեկը՝ Լևոն Մուրադյանը, տեղեկացնում է, որ իր նախագծած և պատենտավորած սարքավորումը թույլ կտա կորզել ստորգետնյա չոր ապարների ջերմությունը և փոխարկել այն էլեկտրական էներգիայի: Թերթն ակնկալում է «պատկան մարմինների» շահագրգիռ արձագանքը: «Նովոյե վրեմյան» հերթական անգամ բացատրում է, թե ինչու չի կարելի Սյունիքի արոտավայրերը վարձակալության տալ: Թերթը նաև փոխանցում է Վերստուգիչ պալատի բացահայտումը, որ երկրում վատորակ ասֆալտ է փռվում: «Գոլոս Արմենիին» իր հերթին տեղեկացնում է, որ կառավարության որոշմամբ քաղաքաշինությանը գումար է հատկացվել շինարարական նոր նորմատիվներ սահմանելու համար: Այս թերթը հարցազրույցի է հրավիրել էկոնոմիկայի նախարարին՝ «Տնտեսության հիմնական «կերակրատեսակը» արտադրությունը պետք է լինի»:
Մամուլի համատարած լավատեսության համատեքստում ինքնատիպ հոռետես է «ՀԺ»-ն. այս անգամ պարզվել է, որ մեր երկրի գործարար միջավայրի բարելավման ԱՄՀ-ի և ՀԲ-ի ցուցանիշները չեն համընկնում:
