չորեքշաբթի, 8 մայիսի 2013
Կառավարության նոր կազմը սենսացիա չի հարուցում
Այնուամենայնիվ, բազմատեսակ մեկնաբանություններ են անում բոլոր լրատվամիջոցները՝ «ՀՀ», «Հրապարակ», «Առավոտ», «Օրակարգ», «ՀԺ», «ՀԱ», «Ժողովուրդ», «Ժամանակ», «Իրավունք-հետաքննություն». հատուկ «ուշադրության» է արժանացել Յուրի Վարդանյանի նշանակումը:
«Առավոտը» անդրադարձել է աշխատավարձի բարձրացման վերաբերյալ ԱԺ նախագահ Հովիկ Աբրահամյանի երեկվա հայտարարությանը («Ահազանգը հասել է ՀՀԿ-ին»), «Հայաստանի Հանրապետությունը»՝ ճշգրիտ ճարտարագիտության ոլորտի զարգացման նպատակով ձեռնարկվող միջոցառումներին և, մի այլ հրապարակման մեջ («Կստեղծվի արտահանումն ապահովագրող կառույց»), վերամշակված ապրանքների իրացման գործընթացներում պետական աջակցության հնարավորությանն ու հեռանկարներին:
«Օրակարգը» արձագանքել է Օննո Սիմենսի հայտարարությանը, ըստ որի 2012 թ. ընթացքում չկայացած ԵՄ դոնորների համաժողովը «կարող է տեղի ունենալ» այս տարվա նոյեմբեր ամսին:
«Հայկական ժամանակը» նախ գրել է, թե «Հայաստանի տնտեսության ամենամեծ խնդիրը, թերևս, ռեսուրսների կենտրոնացումն է», հետո փորձել «համոզել», թե «նույնիսկ պաշտոնական վիճակագրության համաձայն Հայաստանում փոքր բիզնեսը կուլ է գնում խոշորին»: «Օրակարգը» հավելել է, թե «տնտեսությունում նվազում է ավելացված արժեք ստեղծող ոլորտների մասնաբաժինը»:
Տնտեսությունը վարելու տարատեսակ խորհուրդներ են բովանդակում «Դելովոյ էքսպրեսի» և «Ռեսպուբլիկա Արմենիայի» մի շարք հոդվածներ:
