Հայաստանի Հանրապետության Կառավարություն

Թեև կառավարության նոր կազմը սենսացիա չի հարուցում, այդուհանդերձ, լրատվամիջոցները շարունակել են բազմատեսակ ու «բազմանկյուն» մեկնաբանությունները՝ «Հրապարակ», «Ժողովուրդ», «Հայկական ժամանակ», «168 ժամ», «Հայաստանի Հանրապետություն», «Ազգ»։
«Հայկական ժամանակը» հայտարարել է, թե իբր ԱՎԾ վերջերս հրապարակած տեղեկանքում «կեղծված է Հայաստանում 2012թ. ընթացքում իրականացված օտարերկրյա ներդրումների ցուցանիշը»։ «Հրապարակը» հավելել է «Նաիրիտ» գործարանը ռուսական «Իտերա» և «Ռոսնեֆտ» ընկերություններին հանձնելու վերաբերյալ իր դիտարկումները («Ռուսները դեռ երկար են քննարկելու «Նաիրիտի» հարցը»), մի այլ հրապարակման մեջ էլ՝ Հայաստանի սպառողների ասոցիացիա ՀԿ նախագահ Արմեն Պողոսյանի մտահոգությունը, որ «Հայաստանում առկա է և՛ նոմինալ, և՛ կրիմինալ գնաճ»։
«Հայոց աշխարհն» արձագանքել է շրջանառության հարկի գործադրման հետևանքով տնտեսվարողների շրջանում հարուցած դժգոհությանը, նաև հավելել, որ «եթե հնարավոր լիներ բացահայտել…գոյություն ունեցող իրական շրջանառությունները», ապա վերոհիշյալ հարկատեսակի դրույքաչափը կարելի էր «նույնիսկ 1 տոկոսից ցածր սահմանել»։ «168 ժամն» անցող շաբաթվա հիմնական նորությունը համարել է Էկոնոմիկայի նախարարությունում օրերս կայացած խորհրդակցությունը «գյուղմթերքներով և վերամշակումով զբաղվող 80 կազմակերպությունների ներկայացուցիչների» մասնակցությամբ։