Հայաստանի Հանրապետության Կառավարություն

Սա է, հավանաբար, կառավարության ծրագրի քննարկման ժամանակ հաճախակի հնչող միտքը, որը պատշաճ տեղ է գրավել նաև մամուլում: Ահա վերնագրերը. «Առարկայական մոտեցումներ ըստ ոլորտների» («ՀՀ»), «Կառավարությունը պատրաստ է ստանձնել պատասխանատվություն» («ՀԱ»), «Տիգրան Սարգսյանը խոստանում է մտածելակերպի հեղափոխություն» («Ազգ»), «Ներկայացվել է կառավարության ծրագիրը» («Գոլոս Արմենիի»), «Տիգրան Սարգսյան. սա փոփոխությունների ծրագիր է» («Նովոյե վրեմյա»), «Կառավարությունը աշխատելու է մտածողության դաշտում» («168 ժամ»): Վարչապետի ելույթը լուսաբանել են նաև «Իրավունքը», «Ժողովուրդը», «ՀԺ»-ն:
Վերը թվարկված բոլոր թերթերը, գումարած «Օրակարգը» և «Առավոտը», մասնակցել են գազի թանկացման, իսկ «Ժողովուրդը» և «ՀԺ»-ն՝ նաև արմավիրցի հողագործների բողոքի թեմաների արծարծմանը:
Հայրենի որոշ տեսաբաններ նույնպես վերափոխման կողմնակից են, բայց նրանց հանգիստ չի տալիս մեր իրականությունը և արաբական տարբեր «գարուններն» ամեն կերպ նմանեցնելու սևեռուն գաղափարը: «Օրակարգը» նկատել է, որ վերջին շրջանում ակտիվացել են «հանրային բողոքի տարատեսակ դրսևորումները», «168 ժամը»՝ որ «հասարակությունն արդեն ընդդիմությանը հավատում է այնքան, որքան իշխանությանը», «Հրապարակը»՝ որ «ժողովուրդն ընդունակ է դուրս գալ լայնածավալ բունտերի»: «Իրատես դե ֆակտոն» կանխատեսում է, որ «հեռու չէ այն օրը, երբ կլինենք դասակարգային պայքարի ականատեսը»:
«Գոլոս Արմենիին» անդրադարձել է տեղեկատվական տեխնոլոգիաների զարգացմանը կառավարության աջակցությանը և հավելել, որ ոլորտում «սկսած 1998 թվականից … արձանագրվել է 25 տոկոս աճ»: «Օրակարգը» գրել է, թե «արդյունաբերությունը կորցրել է թափը» և «դանդաղում է տնտեսական ակտիվության տեմպը»: Մի այլ հրապարկման մեջ թերթը հավելել է, որ «Ընդունելության քննությունները մտահոգել են օմբուդսմենին», «Առավոտում» Անահիտ Բախշյանը ներկայացրել է «շտեմարանների ստվերային բիզնեսի մասին» իր դիտարկումները: «Ժամանակի» հետ զրույցում ֆինանսների փոխնախարար Վարդան Արամյանը հայտարարել է, որ առաջիկայում «արտոնյալ վարկերը կպակասեն», քանի որ «Հայաստանն առաջիկայում դուրս կգա միջինից ցածր եկամտով երկրների ցանկից»: «Ազգը» անդրադարձել է 2013թ. հունվար-ապրիլ ամիսների սոցիալ տնտեսական ցուցանիշների վերաբերյալ ԱՎԾ երեկվա հրապարակմանը («Տնտեսական ակտիվության և արդյունաբերության աճի տեմպի նվազում. փոխարենը արտահանումն աճել է, ներմուծումը՝ նվազել»), «Հայկական ժամանակը» մշակույթի նախարարի հետ զրույցում՝ «փակ շուկայի խնդրին» («Երկու քարի արանքում»), «168 ժամը»՝ «մոտ մեկուկես տասնյակ հայ գործարարների՝ չինացի որոշ խաբեբաների կողմից «ծուղակի մեջ հայտնվելու և զգալի գումարներ կորցնելու» պատմությանը: