չորեքշաբթի, 29 մայիսի 2013
Կարմիր, կապույտ, ծիրանագույն…
«Ժողովուրդը» նկատել է, որ Հանրապետության տոնին նվիրված զորահանդեսի ժամանակ ռազմական ինքնաթիռների եռյակը «Հայաստանի երկնքում» մեր եռագույնի փոխարեն պատկերել է «Ռուսաստանի եռագույնը՝ իբրև յուրահատուկ պատասխան այն բանի, որ ՀՀ նախագահը չի մասնակցել ՀԱՊԿ գագաթնաժողովին»: Սույն «գունափոխությունը» որևէ այլ լրատվամիջոց չի նկատել:
«Հայաստանի Հանրապետության» փոխանցմամբ ՀՀ վարչապետ Տիգրան Սարգսյանը Հանրապետության տոնն անցկացրել է Շիրակի մարզում և «մասնակցել Գյումրիի վագոնային վերանորոգման և լոկոմոտիվային դեպոների բացմանը» («Երկաթուղային համակարգը զարգանում է»): Թեման արծարծել է նաև «Գոլոս Արմենիին»: «Հայոց աշխարհը» անդրադարձել է գնաճի հիմնախնդրին և գրել, որ «ԿԲ-ն պատրաստվում է վերանայել իր դրամավարկային քաղաքականությունը»: «Ժամանակը» եվրապարտատոմսերի թողարկման վերաբերյալ կառավարության ընդունած հայեցակարգում «նշմարել» է «սենսացիոն խոստովանություն» առ այն, թե «ընդհանուր պարտք/ՀՆԱ (%) ցուցանիշով Հայաստանը զգալիորեն գերազանցել է պարտքի «վտանգավոր» շեմերը»: Մի այլ հրապարակման մեջ թերթը փորձել է «յուրովի» մեկնաբանել վարչապետի և ԱԺ նախագահի վերջին օրերի ելույթները («Ինչո՞ւ են իրար հետևից հարցազրույցներ տալիս Տիգրան Սարգսյանն ու Հովիկ Աբրահամյանը»)՝ ի վերջո հանգելով եզրակացության, թե իբր «ցանկանում են ներկայանալ առավել վարկանիշային դիրքերից»:
«Հայկական ժամանակը» վերստին «վերակենդանացրել» է մարզպետների պաշտոնանկության թեման, նաև հղում արել իր «աղբյուրներին», ըստ որոնց իբր «հարցը կլուծվի մինչև հունիսի վերջ»: Մի այլ հրապարակման մեջ պարբերականը արձագանքել է ՊԵԿ-ի նախագահի ունեցվածքի և գործունեության վերաբերյալ Բարձրաստիճան պաշտոնատար անձանց հանձնաժողովի եզրակացությանը:
