հինգշաբթի, 20 հունիսի 2013
Հընթացս քննադատության
«Հայաստանի Հանրապետությունը» անդրադարձել է ՀՀ վարչապետ Տիգրան Սարգսյանի Լոռու մարզ կատարած աշխատանքային այցին («Կստեղծվեն նոր աշխատատեղեր»): «Հայոց աշխարհը» ներկայացրել է ԱԺ պատգամավորներ Արծվիկ Մինասյանի և Հովհաննես Մարգարյանի տեսակետները այն հարցի շուրջ, թե «Ինչ կտա նվազագույն աշխատավարձի բարձրացումը»: «Օրակարգը» նշել է, որ կառավարության այսօրվա նիստի օրակարգում ներառված որոշման նախագծերից մեկը վերաբերում է մետրոպոլիտենի վերակառուցման ծրագրին («Հանուն ցածր եկամուտներով սոցիալական խմբերի»): Մի այլ հրապարակման մեջ թերթը քննության է առել արտագաղթի «տարբեր կողմերը» («Արտագաղթը կրճատում է գործազրկությունը»)՝ «յուրօրինակ հակակշիռ» դառնալով «Ազգի» հրապարակմանը՝ «Արտագաղթ՝ ավելի շատ հայրենասիրության պակաս»:
«Գազպրոմի» հետ դեռ գործարք չի կնքվել». խորհրդարանում լրագրողների հետ ճեպազրույցում Էներգետիկայի և բնական պաշարների նախարար Արմեն Մովսիսյանի հայտարարությանը «ուղղակի և անուղղակի» արձագանքել են ոչ միայն «Օրակարգը», այլև «Հայկական ժամանակը» («Կախարդական խոսքը»), «Հրապարակը» և «Ժողովուրդը» («Ինչի՞ դիմաց է «Հայռուսգազարդում» ՀՀ 20%-ը հանձնելու Ռուսաստանին»), որը մի այլ հրապարակման մեջ «գազի թեմայով» զրուցել է նաև ԱԺ պատգամավոր Գարեգին Նուշիկյանի հետ («Ռուսաստանը մինչ այդ արդեն գրավել է մեր տնտեսությունը»):
«Ժամանակի» հետ զրույցում Գառնիկ Իսագուլյանը հայտարարել է՝ «Օֆշորի սկանդալը նսեմացրել է Հայաստանի իշխանության հեղինակությունը»: Թեման արծարծել են նաև «Հայոց աշխարհը», որ ներկայացրել է մանրամասներ ԱԺ պատգամավոր Սուքիաս Ավետիսյանի և ՀԴԿ նախագահ Արամ Սարգսյանի՝ լրագրողների հետ հանդիպումից («Կասկածները դեռ փարատված չեն»), «Առավոտը», «Ժողովուրդը», «Օրակարգը», «Հրապարակը» և «168 ժամը», որը ներկայացրել է նաև հետախուզման մեջ գտնվող «Աշոտ Սուքիասյանի նամակը գլխավոր դատախազին և «Հետքին»:
«Ժողովուրդը» ՎՊ-ի բացահայտումների մասին զրուցել է կառույցի ղեկավար Իշխան Զաքարյանի հետ («Մենք ընդամենն ասում ենք»): Թեման ըստ «ճաշակի յուրո» արծարծել է նաև «Ժամանակը» («ՎՊ նախագահի ու գլխավոր դատախազի հանցավոր լռությունը»):
