չորեքշաբթի, 26 հունիսի 2013
Ասպարեզում մարզպետներն են
Առիթը ֆինանսների նախարարության վերահսկողական ծառայության ստուգումների արդյունքներն են. «Երբ «ավելորդ» ծիրանից ազատվելու համար պետք է… ծառերը կտրել» («Իրավունք- հետաքննություն»), «Սերմացու գողացող մկները» («Ժողովուրդ»), «Կարկուտը ծեծած տեղն է ծեծում» («ՀԱ»), «Մարզպետը հնարավորություններ չունի՞» («ՀԺ»), «Արդյոք մարզը մարզպետի օֆշորը չէ՞» («Հրապարակ»):
Վերահսկիչ պալատի հաշվետվության թեմա. «Իշխան Զաքարյանի նկատմամբ ներիշխանական դժգոհություն է հասունանում» («Ժամանակ»), «Հենց այսպես էլ զարգանում ենք» («Ժողովուրդ»), «Վերահսկիչ պալատը վերցրեց ու բոլորիս սևացրեց» («ՀԱ»):
«Առավոտի» ունեցած տեղեկություններով վերջին մեկ ամսվա ընթացքում մոտ 100 հազար դոլար գումար է «ներդրվել» վարչապետի օֆշորային սկանդալի թեման «տաք» պահելու համար»: Այսօրվա որոշ հրապարակումներից ևս «տաքություն» է փչում:
«Եվրոպական միության հետ Ասոցացման համաձայնագիր ու Ազատ առևտրի գոտու մասին պայմանագի՞ր, թե՞ Մաքսային միությանը անդամակցություն» հարցադրումը «հանգիստ չի տվել» «Հայկական ժամանակին» («Բարի գալուստ «ապահով գուբերնիա», «Սերժի գործերը խառն են») և «Օրակարգին» («Մտավախություններ՝ Վիլնյուսից առաջ», «Իրանական գազը չի կարող այլընտրանք լինել ռուսականին»), որը մի այլ հոդվածում էլ «բռնել-որոշել» է, թե իբր «երկրի իշխանությունները հնարավոր կոլապսը կանխելու համար քաջալերում են արտագաղթը»:
«Ազգը» «Հայաստանում օտարերկրյա ներդրումները պակասել են» հրապարակման մեջ նշել է, որ Դիլիջանի միջազգային դպրոցի ծրագրին համարժեք «խոշոր ներդրումային ծրագիր Հայաստանում ուղղակի չկա» և կարծիք հայտնել, որ այն պետք է «գոնե արհեստական խոչընդոտների չհանդիպի»: «Ժամանակը» վկայակոչել է ԱՄՀ նոր հետազոտությունը ԽՍՀՄ երկրներում ստվերային տնտեսության չափերի վերաբերյալ՝ «ՀՀ տնտեսական ստվերն առաջատար է»: Մի այլ հրապարակման մեջ («ՀՀ կառավարության համար գիտությունը Խորհրդային Միությունից ժառանգություն ստացած մի բեռ է») թերթը ներկայացրել է ֆիզիկոս Արամ Մանասելյանի տեսակետները գիտության թերֆինանսավորման պատճառների վերաբերյալ:
«Օրակարգը» հայտարարել է, որ այս տարվա առաջին եռամսյակում «ֆինանսական համակարգում ամենից շահութաբերը բանկերը չեն» («Փողը փոխում է նախընտրությունները»): Մի այլ հրապարակման մեջ թերթն անդրադարձել է վերաֆինանսավորման տոկոսադրույքը անփոփոխ թողնելու մասին ԿԲ-ի խորհրդի որոշմանը և նշել, թե իբր «կենտրոնական բանկն ապակողմնորոշում է ֆինանսական շուկայի մասնակիցներին» («Մի հանձնարարականի պատմություն»):
