հինգշաբթի, 27 հունիսի 2013
Քննադատություն և առաջարկներ
«Օրակարգը» տեղեկացրել է, որ Ֆինանսների նախարարությունը կառավարության այսօրվա նիստի հաստատմանն է ներկայացրել «Գույքահարկի հարկման համակարգի արդյունավետության բարձրացման ուղիները» հայեցակարգը («Հարկել առանց խտրականության»): Նիստի օրակարգում ընդգրկված հարցերին արձագանքել են նաև «Ժողովուրդը», «Հայոց աշխարհը» և «Հայկական ժամանակը»:
«Առավոտը» ներկայացրել է «ՎՊ-ի հաշվետվության» և «օֆշորային սկանդալի» մասին ԱԱԽ քարտուղարի տեսակետները («Արթուր Բաղդասարյանը Տիգրան Սարգսյանին չհավատալու հիմքեր չունի»): Մի այլ հրապարակման մեջ թերթը «168 ժամի» («Այս լուռ հակամարտությունը դեռևս շատ ջուր է քաղելու») և «Ժամանակի» («Ժամանակավոր արձակուրդ») հետ միասին անդրադարձել է լրագրողների հետ հանդիպման ժամանակ ՀՅԴ խորհրդարանական Աղվան Վարդանյանի արտահայտած տեսակետներին («Բոլորը սպասում են Հայաստանի նախագահի խոսքին»): «168 ժամի» հետ զրույցում նույն խնդիրների կապակցությամբ արտահայտվել է նաև ՀՀԿ անդամ Ռաֆիկ Պետրոսյանը. («Վարչապետն ինչ-որ մարդ չէ, որ հարձակվենք, սկսենք պահանջներ ներկայացնել») և, միաժամանակ, խորհուրդ տվել «սպասել իրավական գնահատականին»:
«Օրակարգը» գրել է, որ ՀԾԿՀ-ն «տուգանել է «Հայաստանի էլեկտրական ցանցեր» ընկերությանը»: «Հրապարակը» անդրադարձել է ուսուցիչների վերապատրաստման նպատակով ֆինանսական միջոցներ չհատկացնելու վերաբերյալ Անահիտ Բախշյանի գնահատականներին, «168 ժամը»՝ «Հյուսիս-Հարավ ճանապարհային միջանցքի ներդրումային ծրագրի» հետ կապված բացահայտումներին:
