շաբաթ, 29 հունիսի 2013
Ուղղակի և անուղղակի գնահատականներ
«168 ժամում» անդրադառնալով Կառավարության հավանությանն արժանացած «Գույքահարկի հարկման համակարգի արդյունավետության բարձրացման ուղիները» հայեցակարգին, Ռուս-հայկական (Սլավոնական) համալսարանի պրոռեկտոր, ֆինանսների նախկին նախարար Էդվարդ Սանդոյանը տարբերակված գույքահարկի սահմանումը որակել է «միանգամայն ճիշտ որոշում», նաև հավելել, թե դա «ոչ միայն բնակելի, այլև արտադրական տարածքների դեպքում պետք է գործի»:
«Ժամանակը» ներկայացրել է «սեփական տեղեկությունները» «ՎՊ-ի հաշվետվությունից հետո… ստեղծված իրավիճակի մասին»: Երկու այլ հրապարակումներում թերթն անդրադարձել է «ռուսական գազի» թեմային («Գազպրոմի առաջարկած գազի գինը վաղուց շուկայական չէ. քաղաքական է», «Հայռուսգազարդի» պարադոքսը. ինչպես մեծացնել շահույթն ու վնաս ցույց տալ), որին «միացել են» «168 ժամը» («Ինչպես «Գազպրոմը» հերթական անգամ «ծակեց» ՀՀ իշխանություններին»), «Գոլոս Արմենիին», որի հետ զրույցում Էներգետիկայի և բնական պաշարների նախարար Արմեն Մովսիսյանը նշել է, որ «Մաքսային միությանը անդամակցումը կնշանակի գազի և ուրանի գնի իջեցում», և «Առավոտը», որը ներկայացրել է ֆիզիկոս Համլետ Կարայանի պարզաբանումները, թե Հայաստանում «էներգետիկ ինչ այլընտրանքներ կան»:
«Հայոց աշխարհը» մտահոգություն է հայտնել, որ «Գնաճի ճնշումը մեծանում է նույնիսկ առանց էներգակիրների թանկացման»: «168 ժամը» իր հանգույն արձագանքել է ԱՄՀ հայաստանյան առաքելության ղեկավարի գլխավորած պատվիրակության՝ գյուղնախարարությունում ընդունելության հաղորդագրությանը («Ինչպե՞ս են ՀՀ պաշտոնյաները շոկի մատնում ԱՄՀ ներկայացուցիչներին»):
