երեքշաբթի, 9 հուլիսի 2013
Հայտարարությունների շրջանակ
«Ազգում» հրապարակված ծավալուն հոդվածում («Պետբյուջեի ծախսերի կեսից ավելին կենսաթոշակներն ու աշխատավարձերն են») ներկայացվել են պետական բյուջեի ծախսերը ըստ ոլորտների, նշվել, որ դրանք «հիմնականում ծառայում են իրենց նպատակներին», և «մնում է միայն ավելի ուշադիր լինել ռիսկային ոլորտներում կատարվող ծախսերի նկատմամբ», որպեսզի «դժվարությամբ հավաքվող հարկային եկամուտները չփոշիացվեն»: «Հրապարակը» («Ի՞նչ եք անընդհատ փորում, փորում, փորում՝ ձուն մաքուր է») և «Առավոտը» («Չպետք է անտեսենք տնտեսվարողի շահը») ներկայացրել են ԱԺ փոխնախագահ Հերմինե Նաղդալյանի դիտարկումները ՎՊ-ի «աղմկահարույց հաշվետվության» վերաբերյալ: «Ժամանակը» թեման արծարծել է «Իշխանությունը չի՞ ուզում օրենքով սահմանափակել ՎՊ-ին» հրապարակման մեջ, «Ժողովուրդը»՝ իր հանգույն ներկայացրել «հունիսի 29-ին Սերժ Սարգսյանի հրավիրած խորհրդակցության մի քանի ուշագրավ նրբություններ» («Ո՞վ է խաբել Սերժ Սարգսյանին»):
«Առավոտի» հետ զրույցում Գլոբալիզացիայի և տարածաշրջանային համագործակցության վերլուծական կենտրոնի նախագահ Ստեփան Գրիգորյանը հայտարարել է, թե «Մաքսային միությունը կամ կքանդվի, կամ կփոփոխվի»: «Ժամանակը» գրել է, թե իբր «իշխանական համակարգում տարիներ շարունակ գոյություն ունեցող հակամարտությունը…կարծես թե գնալով ավելի է սրվում» («Տիգրան և Սերժ Սարգսյանների փորձության ժամը»): «Հայոց աշխարհի» հետ «վարչապետի պաշտոնի շուրջ» զրուցել է ԱԺ պատգամավոր Սամվել Նիկոյանը («Օրը կգա, բարին՝ հետը»), «Ժողովուրդը» փոխանցել է ԱԺ ԲՀԿ խմբակցության քարտուղար Նաիրա Զոհրաբյանի դիտարկումները «տեղի ունեցող լրջագույն քաղաքական իրադարձությունների վերաբերյալ՝ «ԲՀԿ-ն քաղաքական կրկեսների չի մասնակցում»:
«Ժողովուրդը» գրել է, թե «Գազալցակայաններում գազը 40 տոկոսով է թանկացել»: Երևանի հանրային տրանսպորտի ուղեվարձին անդրադարձել են «Հայկական ժամանակը» («Դոտացիա կամ գործադո՞ւլ») և «Հայոց աշխարհը» («Մեր թանկագին կյանք ապրուստիչը»), որը մի այլ հրապարակման մեջ էլ արձագանքել է «արժութային շուկայում դոլարային ճնշման ուժեղացման» իրողությանը («Կենտրոնական բանկը փորձում է կասեցնել դոլարի թուլացումը»):
«Իրավունքը» մայրաքաղաքում վճարովի ավտոկայանատեղիների կազմակերպման նոր կարգին անդրադարձել է «Ավտոկայանատեղիների բիզնեսի «ստվերային» մտահոգությունները» հոդվածում:
