Հայաստանի Հանրապետության Կառավարություն

«Թրանսփերենսի ինթերնեշնլ» հակակոռուպցիոն կենտրոնի հրապարակած կոռուպցիայի համաշխարհային բարոմետրի 2013թ. արդյունքներին իր անդրադարձը «Հայոց աշխարհը» խորագրել է «Ինչու հայաստանցիները չեն ցանկանում պայքարել կոռուպցիայի դեմ»: «Հավակնոտ» վերնագրերի տակ ցավոտ թեման «քննության են առել» նաև «Ժողովուրդը» («Կոռումպացված Հայաստան») և «Ազգը» («Դատական, ոստիկանական և առողջապահական համակարգերն ամենակոռումպացվածն են»): «Հայկական ժամանակը» անդրադարձել է 2013թ. առաջին հինգ ամիսների ընթացքում բյուջեի կատարողականի վերաբերյալ անցած շաբաթ ֆինանսների նախարարության հրապարակած տեղեկատվոությանը՝ «Հավելուրդ ապագայի հաշվին»: «Բյուջեն կրկին թերակատարվում է. գործադիրը շարունակում է զսպել պահանջարկը», հավելել է «Օրակարգը»: «Իրավունքը» անդրադարձել է գյուղմթերքի թանկացման հիմնահարցին («Գյուղնախարարի բարձր բերքի տարօրինակ հետևանքները»): Մի այլ հրապարակման մեջ թերթը հայտարարել է, թե հուլիսի 7-ից գազի և էլեկտրաէներգիայի թանկացումներին հաջորդած «թանկացումների շարանը… ոչ մի տրամաբանության մեջ չի տեղավորվում» («Գազալցակայանները գերշահույթներն են ավելացրել»), որին «միացել են» «Հայոց աշխարհը» («Ո՞վ պետք է զսպի գազալցակայանների տերերի ախորժակը») և «Օրակարգը» («Սեղմել մինչև 40 դրամ. գազի թանկացումը ԱԳԼՃԿ-ներում հիմնավորված չէ»):
«Ժողովուրդը» արձագանքել է կառավարության պաշտոնական կայքէջի «Մեկ անձից կատարվող գնումներ» բաժնում կատարված փոփոխությանը: Թեման արծարծել է նաև «Հայկական ժամանակը», որը մի այլ հոդվածում, «միանալով» «Հրապարակի», «Օրակարգի» և «Հայոց աշխարհի» հրապարակումներին, հայտարարել է՝ «Հանրային տրանսպորտը կթանկանա»: «Ժամանակը» անդրադարձել է անցած շաբաթ կառավարության կողմից հաստատված՝ «հաջորդ երեք տարվա պետական միջնաժամկետ ծախսերի ծրագրին» և գրել, թե «Գիտության ֆինանսավորման էական աճ չի նախատեսվում նաև 2014-2016թթ.-ին»: