Հայաստանի Հանրապետության Կառավարություն

Լրատվամիջոցների զգալի մասը անդրադարձել է կառավարության երեկվա նիստում քննարկված մի շարք հրատապ հիմնախնդիրներին և որոշումներին. «Հայաստանի Հանրապետություն», «Հայկական ժամանակ», «Ժամանակ»: «Առավոտի» հետ զրույցում «Խաղողի հումքից ոգելից խմիչքների մասին» օրենքում փոփոխություն կատարելու որոշումը վիճարկել է Գինեգործների միության նախագահ Ավագ Հարությունյանը, թե իբր՝ «Կառավարության որոշումը նպաստում է գինու կեղծարարությանը»: Գինու թեման արծարծել են նաև «Ազգը» («Հայկական գինին և եվրոպական շուկան») և «Օրակարգը» («Գինու արտադրությունն աճել է, կոնյակինը՝ ընկել»):
«Ազգը» («Հույսով Հայաստան եկած Ընդլայնման հանձնակատարը») և «Առավոտը» («ԵՄ հանձնակատարը «ապառնաց» դատի տալ Հայաստանին» և «ԵՄ-ն Հայաստանի առջև ընտրության հարց չի դնում») անդրադարձել են քաղաքացիական հասարակության և լրատվամիջոցների ներկայացուցիչների հետ Շտեֆան Ֆյուլեի հանդիպման մանրամասներին և ԵՄ պաշտոնյայի դիտարկումներին:
«Ժամանակը» ՎՊ-ի «աղմկահարույց բացահայտումների» թեման շարունակել է «տարտղնել» ՀՅԴ խորհրդարանական Արծվիկ Մինասյանի հետ զրույցում՝ «Ինչո՞ւ է Իշխան Զաքարյանը զգուշանում մեկնաբանություններ և բացատրություններ տալուց», «Հրապարակը»՝ «քննության առել» ՎՊ-ի մասին օրենքում փոփոխություններ կատարելու հետ կապված «սեփական տեղեկությունները»: «Օրակարգը», «Ժամանակը», «Հայոց աշխարհը» և «Ժողովուրդը» անդրադարձել են ՀՅԴ բյուրոյի ներկայացուցիչ Հրանտ Մարգարյանի՝ «Ազատություն» ռադիոկայանի հետ զրույցում արած հայտարարությանը, թե իբր «վարչապետ Տիգրան Սարգսյանը պատերազմ է հայտարարում Դաշնակցությանը», և հարակից «կոշտ դիտարկումներին»: «Հայկական ժամանակը» «գազի թեմայով» զրուցել է Էներգետիկայի և բնական պաշարների նախարարի հետ («Ի՞նչ ենք տալու ռուսներին»), «Ժամանակը»՝ արձագանքել 2014-2016թթ. միջնաժամկետ ծախսերի ծրագրի գերակայություններից մեկին՝ «Պետծառայողների աշխատավարձը 2014-ին կաճի 40%, 2015-ին՝ 10%, 2016-ին՝ 13,6%»: