շաբաթ, 13 հուլիսի 2013
Համագործակցությունը՝ ուղիղ ճանապարհ
«Հայաստանի Հանրապետությունը» լրագրողների հետ երեկվա հանդիպման ընթացքում Արդյունաբերության զարգացման հիմնադրամի տնօրեն Հայկ Միրզոյանի՝ դեղագործության զարգացման ու հեռանկարների վերաբերյալ գնահատականներին անդրադարձում նշել է, որ «պետություն-մասնավոր հատված համագործակցությունը կայանում է» («Դեղագործությունը՝ հեռանկարային ոլորտ»): «168 ժամը» («Դեղարտադրություն. մրցակցությունը թե´ դրսում, թե´ ներսում») հավելել է ոլորտի ներկայացուցիչների տեսակետը, որ բնագավառի «առավել մեծ տեմպերով» զարգացմանը նպաստելու ճանապարհը որակի սերտիֆիկացման համակարգերի ներդրումն է, ինչը նախատեսված է կառավարության որոշմամբ:
«Հայոց աշխարհը» գրել է, որ «Բյուջեի եկամուտները առաջ են անցել ծախսերից», ինչը որակել է «Հայաստանի համար աննախադեպ մի վիճակ», նաև առաջարկել «ժամանակավոր ազատ միջոցները» «ուղղել տնտեսություն»: «Հայկական ժամանակը» Արարատի մարզում դիզելային վառելիքի անհամաչափ բաշխման «չարչրկվող թեմային» իր արձագանքը խորագրել է «Ձերբակալել բոլորին»: «Ազգը» և «Նովոյե վրեմյան» շարունակել են ՀՅԴ ներկայացուցիչ Հրանտ Մարգարյանի՝ իբր «վարչապետ-դաշնակցություն» համակարտության մասին հայտարարության «քննարկումը», «Առավոտը»՝ փորձել «վերծանել» «Օֆշորային սկանդալի քաղաքական «աստառը»:
