Հայաստանի Հանրապետության Կառավարություն

«Օրակարգը», անդրադառնալով կառավարության առաջիկա նիստի հաստատմանը Էկոնոմիկայի նախարարության ներկայացրած որոշման նախագծի մանրամասներին, նշել է, որ «օգոստոսից… Հայաստանում ազատ տնտեսական գոտի է գործարկվելու»: «Ազգի» հետ զրույցում Ֆինանսների փոխնախարար Պավել Սաֆարյանը, ներկայացնելով 2014-2016թթ. միջնաժամկետ ծախսային ծրագրում ընգրկված միջոցառումները, նշել է, որ «առաջիկա տարիներին նախատեսված քայլերը աննախադեպ կլինեն», մասնավորապես՝ «եկող տարի կենսաթոշակները կբարձրանան 20, աշխատավարձը՝ 85 տոկոսով»: «Շվեյցարիան Հայաստանում 30 մլն դոլարի ծրագիր կիրականացնի», գրել է «Օրակարգը» և հավելել, որ առաջիկա 4 տարիների ներդրումներն ընդգրկելու են «տնտեսական զարգացման, զբաղվածության, կառավարման, հանրային ծառայությունների, անվտանգության և պաշտպանության ոլորտները»: Մի այլ հրապարակման մեջ թերթը հավելել է, որ «ընթացիկ տարվա վեց ամիսներին Հայաստանի արտաքին պարտքը կրճատվել է 4,5%-ով» («Փակվել փոխարժեքի հաշվին»):
«Հայկական ժամանակը» փորձել է «սեփական մանրադիտակի տակ» դիտարկել վերջին 4-5 տարիների ընթացքում բյուջեի եկամտային մասի կրկնապատկման վերաբերյալ ՀՀ նախագահ Սերժ Սարգսյանի երեկվա հայտարարությունը, «Ժողովուրդը»՝ արձագանքել ու «կասկածի տակ առել» պետբյուջեի միջոցների օգտագործման արդյունավետությունը՝ մի այլ հոդվածում հընթացս «իրար կապելով» թանկացումների թեման ու արտագաղթը («Թանկացումները նպաստում են արտագաղթի աճին»):
«Առավոտը» զրուցել է Էկոնոմիկայի նախարարության շուկայի և սպառողների շահերի պաշտպանության վարչության պետ Լևոն Խալիկյանի հետ («Գագիկ Ծառուկյանի գազալցակայանների աշխատանքները կկասեցվե՞ն. Էկոնոմիկայի նախարարությունը խոստանում է տուգանել և կասեցնել առանց բաշխիչ աշտարակների գազալցակայանները»): «Չարչրկվող գազի թեման» արծարծել է նաև «Իրավունքը»՝ անդրադառնալով ՏՄՊՊ հանձնաժողովի ուսումնասիրության որոշ մանրամասներին: