Հայաստանի Հանրապետության Կառավարություն

«Ազգը» Հայաստանի տնտեսական վիճակի մասին երեկվա ասուլիսում Վերակառուցման և զարգացման եվրոպական բանկի (ՎԶԵԲ) նախագահ Սումա Չակրաբարտիի անդրադարձը մեկնաբանել է «2,5-3 տոկոսից ավելի տնտեսական աճը չափազանց գովելի է Հայաստանի համար», ԱՎԾ-ի՝ 2013-ի հունվար-հունիս ամիսների սոցիալ-տնտեսական ցուցանիշների հրապարակումը՝ «Հունիսին՝ տնտեսական ակտիվության աճ» հոդվածներում: «Հայոց աշխարհը», «Նովոյե վրեմյան» և «Հայաստանի Հանրապետությունը» ներկայացրել են մանրամասներ «Լույս» հիմնադրամի 2013-2014 ուս. տարվա կրթաթոշակառուների հետ ՀՀ նախագահ Սերժ Սարգսյանի և վարչապետ Տիգրան Սարգսյանի հանդիպումից: «Առավոտը» արձագանքել է դեղերի ֆիզիկական և տնտեսական մատչելիության պահպանման նպատակով իրականացվող գործընթացներին. «Դեղի գրանցումը կարող է նաև մերժվել, եթե դրա անվտանգության, որակի մասին չկան գիտականորեն հիմնավորված բավարար տվյալներ»:
«168 ժամը» ոչ միայն փորձել է պարզել, թե «ինչ կշահի կամ կկորցնի Հայաստանը՝ ստորագրելով Ասոցացման համաձայնագիրը» («Կա´մ… կա´մ: Ե´վ… ե´վ: Իսկ գուցե՝ Ո´չ… Ո՞չ»), այլև երկու այլ հրապարակումներում գրել, որ արդյունահանման մեկնարկից հետո «Ամուլսարի ոսկու պաշարները հայտնաբերած» «Գեոթիմ» ՓԲԸ-ն «կդառնա Հայաստանի խոշորագույն հարկատուներից մեկը» և թե՝ Երևան քաղաքում «միկրոավտոբուսների ուղեվարձի իրական ինքնարժեքը 90 դրամ է»:
Հայաստանը ծերանում է և ժողովրդագրական խնդիրները դառնում են ազգային անվտանգության խնդիր, ահազանգում է «Գոլոս Արմենիին», անհրաժեշտ համարելով իրականացնել ազգային պետական ծրագիր: Ներկայումս իրականացվող քաղաքականությունը թերթը համարում է անբավարար, աշխատանք չունեցող կանանց երեխայի խնամքի նպաստ չվճարելը՝ խտրականություն («Ժողովրդագրություն, կամ ով ում չի սիրում»):
Մեկ այլ հրապարակմամբ թերթն անդրադարձել է Արագածոտնի մարզպետի հրամանով աշխատանքից ազատված մարզպետարանի աշխատակից Վարդան Մարգարյանի ոդիսականին, ով ՀՀ վարչապետին ուղղված նամակում կոչ է անում ուշադրություն դարձնել այն հանգամանքին, որ ղեկավարությունը հաճախ առաջնորդվում է ոչ թե աշխատանքային օրենսդրությամբ, այլ անձնական պատվամոլությամբ, և այս երևույթի դեմ պետք է պայքարել («Մի՞թե ղեկավարը միշտ ճշմարիտ է»):